Qazaqstan Reseige elektr energiiasyn jetkizip jatyr. Energetika ministri Erlan Aqkenjenov aldaǵy qysqy maýsymda elimizdiń jylý elektr ortalyqtary elektr energiiasyna túsetin júktemeniń artýyna daiyn ekenin málimdedi, dep habarlaidy dalanews.kz.
Ministrdiń aitýynsha, biyl elektr energiiasyn tutynýdyń eń joǵary kórsetkishi 3 paiyzǵa ósip, 18 200 megavatqa jetýi múmkin.
«Jylý elektr ortalyqtary bul júktemege tótep beredi. Apattylyq deńgeiin tómendetip, stantsiialardyń jumysyn jaqsartý úshin kóp jumys atqardyq. Qazir barlyq stantsiia shtattyq rejimde jumys istep tur», – dedi Erlan Aqkenjenov.
Sondai-aq ministr Qazaqstannyń Reseige eki kún qatarynan elektr energiiasyn jetkizgenin aitty. Onyń sózinshe, aldyńǵy kúni eksport kólemi 120 megavatt bolsa, kelesi kúni shamamen 70-80 megavatty quraǵan.
«Bul elimizdiń keshki ýaqytta elektr energiiasyn tutyný kólemi sharyqtaý shegine jetken kezde de óz qajettiligin qamtamasyz etip otyrǵanyn kórsetedi. Qazaqstan elektr energiiasymen ózin tolyq qamtamasyz etýge jaqyndap keledi», – dedi ministr.
Budan bólek, Energetika ministrligi 2027 jyly elde elektr energiiasynyń profitsiti 1,5 mlrd kilovatt-saǵat bolady dep boljap otyr.
