Qazaqstanda órt pen iis tiip ýlaný saldarynan kóz jumatyndardyń basym bóligi – zeinetkerler men ýaqytsha jumys istemeitin azamattar. Bul týraly Úkimet otyrysynda Tótenshe jaǵdailar ministri Murat Muhanov málimdedi, dep habarlaidy dalanews.kz.
Ministrdiń aitýynsha, ótken jylǵy taldaý jylytý maýsymynda órtterdiń 55%-dan astamy turǵyn úi sektorynda, onyń ishinde jeke turǵyn úilerde bolǵanyn kórsetken.
«Órttiń negizgi sebepteri – elektr qurylǵylaryn ornatý jáne paidalaný qaǵidalaryn buzý, peshpen jylytý júielerin durys paidalanbaý, sondai-aq otty abaisyz qoldaný. Sonymen qatar órt pen iis tiip ýlaný saldarynan qaza tapqandardyń basym bóligi zeinetkerler men ýaqytsha jumys istemeitin azamattar», – dedi Murat Muhanov.
Osyǵan bailanysty «Ata-ananyń úiin tekser» atty arnaiy aktsiia bastalǵan. Onyń maqsaty – zeinetkerlerdiń úilerindegi órt qaýpin anyqtap, qaýipsizdikke tónetin qaterlerdi joiý.
Ministrdiń sózinshe, ákimdikter men eriktiler birlesip, zeinetkerlerdiń turǵyn úileriniń qaýipsizdigin qamtamasyz etýge baǵyttalǵan ataýly kómek kórsetip jatyr. Sondai-aq turǵyndardyń ótinishterine jedel jaýap berý úshin bailanys jelisi uiymdastyrylǵan.
Budan bólek, turǵyn úi sektorynda táýekelge baǵdarlanǵan profilaktikalyq jumystar júrgizilýde. Bul rette úilerdi aralaý olardyń sanyna qarai emes, órt shyǵý qaýpiniń deńgeiine bailanysty uiymdastyrylady.
«Qazirgi ýaqytta osy sanattaǵy 93 myńnan astam úi esepke alynǵan», – dep naqtylady ministr.
