Aziia qor naryqtary ótken aptadaǵy tehnologiialyq kompaniialar aktsiialarynyń jappai satylymynan keiin qaita qalpyna kele bastady. Dúisenbide birqatar negizgi birjalyq indekster ósim kórsetti, dep habarlaidy dalanews.kz.
Reuters agenttiginiń málimetinshe, Japoniianyń Nikkei indeksi 2,5%-ǵa kóterildi. Japoniia men Qytaidy qospaǵandaǵy Aziia-Tynyq muhity aimaǵy aktsiialarynyń MSCI indeksi 0,8%-ǵa ósti. Taivannyń negizgi birjalyq indeksi de shamamen 2,5%-ǵa joǵarylady.
Associated Press deregine sáikes, ósim ásirese tehnologiialyq kompaniialar shoǵyrlanǵan naryqtarda baiqaldy. Taivannyń Taiex indeksi 5,6%-ǵa kóterilip, jartylai ótkizgish óndirýshi TSMC aktsiialary da sonsha ósim kórsetti. Japoniianyń Nikkei 225 indeksi 3,4%-ǵa, Ońtústik Koreianyń Kospi indeksi 1,5%-ǵa artty.
Buǵan deiin tehnologiialyq kompaniialar aktsiialarynyń kúrt arzandaýy Aziia naryqtaryna aitarlyqtai áser etken. Ótken aptada Japoniia men Ońtústik Koreia birjalaryndaǵy indekster bir kúnde shamamen 6%-ǵa tómendedi. Al Taivan naryǵy sońǵy jiyrma jyldaǵy eń iri aptalyq quldyraýlardyń birin tirkedi.
Satylymǵa jasandy intellekt salasyndaǵy investitsiialardyń tiimdiligine qatysty kúmán, jartylai ótkizgishterge suranystyń ózgerýi jáne AQSh-taǵy retteý sharalarynyń kúsheiýi múmkin degen qaýip túrtki bolǵan. Investorlar jasandy intellektke arnalǵan derekter ortalyqtarynyń qurylysy baiaýlaýy yqtimal dep alańdaǵan.
AQSh-taǵy tehnologiialyq aktsiialardyń juma kúngi qaita ósýi Aziia naryqtaryna da oń áser etti. Nasdaq indeksi 1,1%-ǵa, S&P 500 indeksi 0,3%-ǵa kóterildi. Nvidia aktsiialary da aldyńǵy kúnderdegi quldyraýdan keiin 2,8%-ǵa ósti.
Soǵan qaramastan, sarapshylar naryqtaǵy turaqtylyq tolyq qalpyna keldi dep aitýǵa áli erte ekenin eskertedi. Investorlar jasandy intellekt sektoryndaǵy kompaniialardyń baǵasyn, retteý táýekelderin jáne tehnologiialyq infraqurylymǵa jumsalatyn shyǵyndardyń aýqymyn qaita baǵalap jatyr.
