Азия қор нарықтары өткен аптадағы технологиялық компаниялар акцияларының жаппай сатылымынан кейін қайта қалпына келе бастады. Дүйсенбіде бірқатар негізгі биржалық индекстер өсім көрсетті, деп хабарлайды dalanews.kz.
Reuters агенттігінің мәліметінше, Жапонияның Nikkei индексі 2,5%-ға көтерілді. Жапония мен Қытайды қоспағандағы Азия-Тынық мұхиты аймағы акцияларының MSCI индексі 0,8%-ға өсті. Тайваньның негізгі биржалық индексі де шамамен 2,5%-ға жоғарылады.
Associated Press дерегіне сәйкес, өсім әсіресе технологиялық компаниялар шоғырланған нарықтарда байқалды. Тайваньның Taiex индексі 5,6%-ға көтеріліп, жартылай өткізгіш өндіруші TSMC акциялары да сонша өсім көрсетті. Жапонияның Nikkei 225 индексі 3,4%-ға, Оңтүстік Кореяның Kospi индексі 1,5%-ға артты.
Бұған дейін технологиялық компаниялар акцияларының күрт арзандауы Азия нарықтарына айтарлықтай әсер еткен. Өткен аптада Жапония мен Оңтүстік Корея биржаларындағы индекстер бір күнде шамамен 6%-ға төмендеді. Ал Тайвань нарығы соңғы жиырма жылдағы ең ірі апталық құлдыраулардың бірін тіркеді.
Сатылымға жасанды интеллект саласындағы инвестициялардың тиімділігіне қатысты күмән, жартылай өткізгіштерге сұраныстың өзгеруі және АҚШ-тағы реттеу шараларының күшеюі мүмкін деген қауіп түрткі болған. Инвесторлар жасанды интеллектке арналған деректер орталықтарының құрылысы баяулауы ықтимал деп алаңдаған.
АҚШ-тағы технологиялық акциялардың жұма күнгі қайта өсуі Азия нарықтарына да оң әсер етті. Nasdaq индексі 1,1%-ға, S&P 500 индексі 0,3%-ға көтерілді. Nvidia акциялары да алдыңғы күндердегі құлдыраудан кейін 2,8%-ға өсті.
Соған қарамастан, сарапшылар нарықтағы тұрақтылық толық қалпына келді деп айтуға әлі ерте екенін ескертеді. Инвесторлар жасанды интеллект секторындағы компаниялардың бағасын, реттеу тәуекелдерін және технологиялық инфрақұрылымға жұмсалатын шығындардың ауқымын қайта бағалап жатыр.
