Quryltai depýtaty Ashat Aimaǵambetov smartfon men áleýmettik jelilerge táýeldilikti azaitý úshin kúndelikti ádetin ózgertkenin aitty. Ol sońǵy ýaqytta telefonyn "Zeiin qoiý" rejimine aýystyryp, habarlamalardy úsh saǵat saiyn ǵana tekserýge tyrysatynyn jetkizdi, dep habarlaidy dalanews.kz.
Depýtat áleýmettik jelidegi paraqshasynda messendjerlerden úzdiksiz keletin habarlamalar adamnyń jumysqa zeiin qoiýyna kedergi keltiretinin jazdy. Onyń aitýynsha, qazir telefony men saǵatyna áleýmettik jelilerden jáne Telegram arnalarynan keletin eskertýlerdi óshirip qoiǵan.
"Sońǵy kezde telefonymdy "Zeiin qoiý" rejimine qoiyp, habarlamalardy úsh saǵatta bir ret qana ashyp kórýge tyrysyp júrmin. Saǵat pen telefon ekranyna áleýmettik jeliler men telegram-arnalardan shyǵatyn eskertýler de óshirýli", – dep jazdy Ashat Aimaǵambetov.
Ol messendjerlerde kez kelgen másele úshin jeke chat ashý ádeti qalyptasqanyn, munyń da adamnyń ýaqytyn alatynyn atap ótti. Depýtattyń sózinshe, úsh saǵattan keiin telefondy ashqanda júzdegen habarlama jinalyp qalady. Olardyń arasynda nege birden jaýap bermegenin surap, renish bildiretinder de kezdesedi.
"Baiqasaq, únemi bailanysta bolýdy jaýapkershiliktiń belgisi dep sanaýǵa úirenip ketippiz. Biraq kúni boiy telefonǵa telmirip otyrý men tyndyrymdy jumys isteý - ekeýi eki bólek nárse ǵoi", – dedi ol.
Ashat Aimaǵambetov ár habarlamaǵa birden jaýap berý mindet emes ekenin aityp, adamdardyń bir-biriniń ýaqytyn qurmetteýi mańyzdy dep esepteidi. Onyń pikirinshe, shuǵyl másele týyndaǵan jaǵdaida telefon soǵýǵa bolady. Al asa mańyzdy emes habarlamalarǵa jaýap alý úshin birneshe saǵat kútý qalypty jaǵdaiǵa ainalýy kerek.
"Menińshe, ózara bylai kelisip alýǵa bolady: sharýa shynymen tyǵyz bolsa – qońyraý shalaiyq. Al asyǵys bolmasa – birneshe saǵat kúte turýǵa ábden bolady", – dep jazdy depýtat.
Ol qoǵamda adamnyń demalý quqyǵyna qurmet qalyptasa bastaǵanymen, eshkimge alańdamai jumys isteý quqyǵyna jetkilikti mán berilmeitinin jetkizdi.
"Adamnyń demalý quqyǵyn qurmetteýdi úirendik qoi. Al onyń eshkimge alańdamai, tynysh otyryp jumys isteý quqyǵyna kelgende áli de azdaý túsip jatamyz", – dedi Ashat Aimaǵambetov.
