Qazaqstandaǵy iri qurylys kompaniialary kelesi jyly bastalýy josparlanǵan «Halyqtyq qurylys» baǵdarlamasyna daiyndyqty bastap ketken. Naryqtaǵy birqatar merdiger qurylys tehnikasy men óndiristik qýatyn túgendep, qosymsha jumys kúshin tartý múmkindigin qarastyryp jatyr, dep habarlaidy dalanews.kz.
Keibir qurylys kompaniialarynda ishki jinalystar ótkizilip, qolda bar tehnika men qural-jabdyqtarǵa reviziia júrgizilýde. Merdigerler aldaǵy memlekettik tapsyrystardy oryndaý úshin qansha jumysshy men tehnika qajet bolatynyn aldyn ala eseptep jatyr.
Basylym derekkóziniń aitýynsha, qurylys salasyndaǵy kompaniialardyń kóńil kúii kóterińki. Aldaǵy ýaqytta shtat sanyn kóbeitý josparlanyp, qosymsha jumysshylarǵa da daiyn bolý týraly habar berilgen.
Mundai belsendiliktiń sebebi – prezident Qasym-Jomart Toqaev jariialaǵan «Halyqtyq qurylys» bastamasy. Jospar boiynsha, 2029 jyldyń sońyna deiin Ulttyq qordan infraqurylymdy jańǵyrtýǵa shamamen 6,5 trln teńge baǵyttaý kózdelgen. Onyń 1,5 trln teńgesi 2026 jyly jáne 2027 jyldyń alǵashqy eki aiynda áleýmettik jobalardy iske qosýǵa qarastyrylýy múmkin.
Joba aiasynda respýblika boiynsha 70-ke jýyq densaýlyq saqtaý nysanyn salý josparlanyp otyr. Olardyń qatarynda perzenthanalar, aýrýhanalar, jedel meditsinalyq járdem stantsiialary men ońaltý ortalyqtary bar.
Budan bólek, bilim berý, sport jáne mádeniet salalarynda 50-ge jýyq nysan boi kóterýi múmkin. Sondai-aq avtomobil joldary, kólik infraqurylymy, injenerlik jeliler, turǵyn úi-kommýnaldyq sharýashylyq, aýyzsý jáne gazben qamtý jobalaryna basymdyq berilmek.
Ulttyq statistika biýrosynyń naqtylanǵan deregine sáikes, 2025 jyldyń tolyq qorytyndysy men 2026 jyldyń alǵashqy toǵyz aiynda Qazaqstanda jalpy quny 18,66 trln teńgege jýyq qurylys jumysy oryndalǵan. Bul eki jyldyq emes, 21 aidyń jiyntyq kórsetkishi.
Al 2026 jyldyń toǵyz aiyndaǵy qurylys jumystarynyń 89%-yn jeke qurylys uiymdary atqarǵan. Sheteldik kompaniialardyń úlesi 10,3%-dy qurasa, memlekettik uiymdardyń úlesi 0,7% bolǵan.
Osylaisha, memleket iri infraqurylymdyq jobalarǵa qarjy bólgenimen, qurylys jumystarynyń basym bóligin jeke sektor júzege asyrady. Sarapshylar men naryq qatysýshylary úshin aldaǵy memlekettik tapsyrystar iri merdigerler, orta jáne óńirlik qurylys kompaniialary, sondai-aq qurylys materialdaryn óndirýshiler arasyndaǵy básekeni kúsheitýi múmkin.
