Qazaqstandaǵy ekinshi deńgeili bankter hakerlik shabýyldar men aqparattyq júielerdegi ózge de kiberintsidentter týraly Qarjy naryǵyn retteý jáne damytý agenttigine (QNRDA) 24 saǵattan keshiktirmei habarlaýy tiis, dep habarlaidy dalanews.kz.
Jańa talaptarǵa sáikes, bankter mynadai jaǵdailar týraly retteýshige aqparat berýge mindetti:
- aqparattyq júielerge hakerlik shabýyl jasalsa;
- DDoS-shabýyldar tirkelse;
- derekterge zańsyz qol jetkizý faktileri anyqtalsa;
- serverlerge virýstar juqsa;
- klientterdi sáikestendirý júielerinde aqaý paida bolsa.
Málimetter arnaiy aqparattyq júie arqyly jiberiledi. Eger júie jumys istemese, bank aldymen telefon arqyly habarlap, keiin oqiǵanyń tolyq mán-jaiy kórsetilgen jazbasha habarlama joldaýy kerek. Talap Qazaqstanda jumys isteitin otandyq jáne sheteldik bankterge, sondai-aq jekelegen bank operatsiialaryn júzege asyratyn uiymdarǵa qoldanylady.
Qaýly alǵashqy resmi jariialanǵan kúnnen bastap kúntizbelik 10 kún ótken soń kúshine enedi.
