Qazaqstanda jumys berýshiler qyzmetkerlerdiń jalaqysynan ustalatyn salyqtar men áleýmettik tólemderdi avtomatty túrde eseptei alatyn jańa servis iske qosylady, dep habarlaidy dalanews.kz.
Qarjy ministriniń mindetin atqarýshy jańa servisti engizý týraly buiryqqa qol qoidy. Joba jumys berýshilerge tólemderdi esepteý jáne aýdarý protsesin jeńildetýge baǵyttalǵan.
Jańa servistiń jumys tártibi mynadai:
Jumys berýshi «Salyq tóleýshiniń kabineti» arqyly qyzmetkerdiń JSN-i men jalaqy mólsherin engizedi. Júie Eńbek jáne halyqty áleýmettik qorǵaý ministrliginen qyzmetkerdiń áleýmettik mártebesi týraly málimetterdi avtomatty túrde suratady.
Osy derekter negizinde jeke tabys salyǵy, mindetti zeinetaqy jarnalary, mindetti áleýmettik meditsinalyq saqtandyrý jarnalary, áleýmettik salyq, jumys berýshiniń mindetti zeinetaqy jarnalary jáne basqa da tólemder esepteledi.
Servis jeke jáne jiyntyq tólem tapsyrmalaryn qalyptastyryp, elektrondyq tsifrlyq qoltańba arqyly ekinshi deńgeili bankterge jiberedi. Jumys berýshi tólemderdiń oryndalý barysyn da baqylai alady.
Joba 2026 jylǵy 1 qazannan bastap týyndaǵan mindettemelerdi qamtidy. Onyń qoldanylý merzimi 31 jeltoqsanǵa deiin belgilengen. Buiryq 17 qarashada kúshine enedi. Pilottyq joba Qazaqstannyń barlyq aýmaǵynda júzege asyrylady. Oǵan salyq agentteriniń qatysýy erikti. Jumys berýshi servisti paidalanýdy kez kelgen ýaqytta toqtata alady.
Sonymen qatar erejelerde jalaqy mólsherin qate engizý, qosymsha tólemder esepteý nemese banktiń tólemdi qaitarýy jaǵdaiynda qaita esepteý múmkindigi qarastyrylǵan. Júiede tehnikalyq aqaýlar týyndaǵan kezde de arnaiy tártip qoldanylady.
