«Qazaqmys» korporatsiiasy Ulytaý, Qaraǵandy jáne Abai oblystaryndaǵy bolashaǵy bar ýchaskeler men qoldanystaǵy ken oryndarynda geofizikalyq zertteý júrgizýde, dep habarlaidy dalanews.kz.
Jer qoinaýynyń geologiialyq qurylymyn zerdeleý jáne taý-ken jumysyn josparlaý dáldigin arttyrý maqsatynda elektrlik jáne magnittik barlaý, ushqyshsyz ushý apparattary arqyly túsirilim jasaý jáne lazerlik 3D-skanerleý siiaqty zamanaýi tehnologiialar qoldanylýda.
Jańa baǵyttyń biri – Ulytaý oblysyndaǵy Tasqura ýchaskesinde elektrlik barlaý jumysyn júrgizý. Bul zertteýge «Qazaqmys» Tobynyń quramyna kiretin Qazaq Geophysics kompaniiasy kiristi.
Tasqura ken alańynda jalpy aýdany 7,1 sharshy shaqyrymdy quraityn eki ýchaske zertteledi. Mamandar aýmaqtyń 500 metr tereńdiktegi geologiialyq qurylymyn zerdelep, mys-sýlfidti mineraldanýdyń bolýy múmkin ekenin kórsetetin aimaqtardy anyqtaidy.
Elektrlik barlaý jumysynyń josparlanǵan jalpy kólemi 156 qýma shaqyrymdy quraidy. Onyń 15 shaqyrymyn 2026 jyldyń sońyna deiin, al qalǵan 141 shaqyrymyn 2027 jyly oryndaý kózdelgen.
Korporatsiianyń basqa da ýchaskelerinde geofizikalyq zertteý jumysy júrgizilýde. Abai oblysyndaǵy Qusmuryn-Aqbastaý ken alańynda jalpy kólemi 52,4 shaqyrym bolatyn elektrlik barlaý jumysy aiaqtaldy. Sonymen qatar jalpy uzyndyǵy 1 500 metrdi quraityn uńǵymalarda qosymsha zertteý júrgizý josparlanǵan.
Qaraǵandy oblysyndaǵy Burnaq ken alańynda 702 shaqyrym jer ústi magnittik barlaý jáne 10 shaqyrym elektrlik barlaý jumysy júrgizildi. Qyzyladyr ýchaskesinde geofizikalyq zertteý 19,5 sharshy shaqyrym aýmaqty qamtydy. Alynǵan derek geologiialyq karta men aýmaqtyń úsh ólshemdi modelin ázirleýge paidalanylady.
Saiaq ken alańyndaǵy Moldybai ýchaskesinde 310 shaqyrym jer ústi magnittik barlaý jumysyn qamtyǵan zertteýdiń birinshi kezeńi aiaqtaldy. Alynǵan derek óńdelgennen keiin elektrlik barlaý jumysynyń kelesi kezeńin júrgizý josparlanǵan.
Jumystyń taǵy bir mańyzdy baǵyty – ushqyshsyz ushý apparattary men úsh ólshemdi modeldeý tehnologiialaryn qoldaný.
Qaraǵandy oblysyndaǵy Abyz kenishinde ushqyshsyz ushý apparatynyń kómegimen aýdany 0,7 sharshy shaqyrymdy quraityn karerge túsirilim júrgizildi. Jinalǵan derek negizinde mamandar nysannyń jai-kúiin baǵalaý jáne kenishtiń paidalaný merzimin uzartýǵa baǵyttalǵan aldaǵy jumysty josparlaý úshin úsh ólshemdi model, jospar jáne qima ázirleidi.
Jylandy kenishiniń jer asty qazbalarynda ushqyshsyz ushý apparatyn paidalaný arqyly lazerlik 3D-skanerleý jumysy júrgizildi. Alynǵan derek taý-ken jumysyn taldaý jáne josparlaý úshin shahtanyń jer asty keńistiginiń tsifrlyq modelin jasaýǵa múmkindik beredi.
Sonymen qatar Qusmuryn-Aqbastaý jáne Nurqazǵan ýchaskelerinde topografiialyq túsirilim jumysy júrgizildi.
Zamanaýi geofizikalyq tehnologiialardy qoldaný «Qazaqmys» korporatsiiasyna jer qoinaýynyń geologiialyq qurylymy týraly neǵurlym tolyq málimet alýǵa, aldaǵy barlaý jumysynyń bolashaǵy bar baǵyttaryn aiqyndaýǵa jáne óndiristik sheshimderdiń ǵylymi-tehnikalyq negizdiligin arttyrýǵa múmkindik beredi.
Zertteý nátijesi aldaǵy geologiialyq barlaý jumysyn josparlaýǵa jáne korporatsiia kásiporyndarynyń mineraldyq-shikizat bazasyn damytýǵa paidalanylady.
