Qazaqstanda 350 myńǵa jýyq turmystyq gaz ballony 40-50 jyldan beri paidalanylyp keledi. Olardy shuǵyl aýystyrý qajet. Bul týraly Tótenshe jaǵdailar ministrliginiń jylytý maýsymyndaǵy órt qaýipsizdigine qatysty baiandamasynda aityldy, dep habarlaidy dalanews.kz.
Ministrlik málimetinshe, jylytý maýsymy bastalǵannan beri turǵyn úi sektoryndaǵy órt sany 12%-ǵa tómendegen. Degenmen bul kórsetkish qaýipsizdik sharalaryn álsiretýge negiz bolmaýy kerek.
Órttiń negizgi sebepteri – aqaýy bar peshterdi paidalaný, murjalardy ýaqtyly tazalamaý, elektr symdarynyń tozýy jáne elektr men gaz jelilerine ruqsatsyz qosylý. Osyǵan bailanysty turǵyndarǵa qaýipsizdik talaptaryn saqtaý qajettigi túsindirilip, profilaktikalyq jumystar júrgizilip jatyr.
Ásirese halyqtyń áleýmettik osal toptaryna jatatyn otbasylardyń úilerindegi qaýipsizdik máselesine erekshe nazar aýdarý qajet. Olardyń baspanalaryna órt týraly habar beretin datchikter ornatý jumystary Túrkistan, Batys Qazaqstan, Mańǵystaý, Jambyl, Qaraǵandy oblystary men Shymkent qalasynda tiisti deńgeide júrgizilmei otyr.
Osyǵan bailanysty ákimdikterge bir apta ishinde áleýmettik osal sanattaǵy otbasylardyń tizimin naqtylap, úilerdi aralaý jumystaryn júrgizý, anyqtalǵan kemshilikterdi joiý jáne datchikterdi satyp alý men ornatýdy qarjylandyrý tapsyryldy.
Budan bólek, turmystyq gaz ballondarynyń qaýipsizdigi ózekti másele bolyp otyr. Ministrliktiń dereginshe, elimizde shamamen 350 myń gaz ballony 40-50 jyldan beri paidalanylyp keledi. Ótken jylytý maýsymynda gaz ballondarynyń jarylýyna bailanysty jeti oqiǵa tirkelgen.
Qazir Kókshetaýda gaz ballondaryn shyǵaratyn zaýyt iske qosylǵan. Atyraý men Almaty qalalarynda da osyndai óndiris oryndaryn ashý josparlanyp otyr. Energetika ministrligine bir ai ishinde eski ballondardy aýystyrý, paidalanýdan shyǵarý jáne olardyń ainalymyn baqylaý tetigin ázirleý tapsyryldy.
Astanada arzan baspana retinde jalǵa beriletin 860 nysan órt qaýpi bar nysandar tizimine engizilgen. Ótken qysqy kezeńde bul nysandarda 30-ǵa jýyq órt bolǵan. Osyǵan bailanysty ákimdik, politsiia jáne tótenshe jaǵdailar qyzmetteri atalǵan nysandardy turaqty tekserip otyrýy qajet.
Ministrlik gazben jylytylatyn úilerde gazdyń taralýyn anyqtaityn datchikter ornatý, sondai-aq sertifikattalǵan qazandyqtar men jabdyqtardy paidalaný qajettigin eskertti.
Órt qaýipsizdigi ailyǵy qarasha aiynyń sońyna deiin jalǵasady. Onyń aiasynda jataqhanalar, hostelder, bilim berý uiymdary men adamdar kóp jinalatyn nysandarǵa basymdyq beriledi. Mádeniet jáne aqparat ministrligine buqaralyq aqparat quraldary men áleýmettik jeliler arqyly órttiń aldyn alý jónindegi túsindirý materialdaryn taratýdy kúsheitý tapsyryldy.
Tótenshe jaǵdailar ministrligi profilaktikalyq jumystardy úilestiredi. Tiisti tapsyrmalardyń oryndalýyn baqylaý Qanat Bozymbaevqa júkteldi.
