Qazaqstanda 2026–2027 jyldardaǵy jylytý maýsymy shtattyq rejimde ótip jatyr. Energetika ministrliginiń málimetinshe, jylý elektr stantsiialarynyń tozý deńgeii 52%-ǵa deiin tómendegen, al elektr jáne jylý jelilerindegi kórsetkish tiisinshe 65,7% jáne 48%-dy quraǵan, dep habarlaidy dalanews.kz.
Energetika ministri Oljas Abaiulyna jasaǵan baiandamasynda biyl elektr stantsiialarynda toǵyz energiia blogyn, 55 qazandyqty jáne 51 týrbinany jóndeý josparlanǵanyn aitty. Qazirgi ýaqytta segiz energiia blogy, 49 qazandyq jáne 37 týrbina boiynsha jóndeý jumystary aiaqtalǵan.
Sonymen qatar óńirlik elektr jelilik kompaniialar 17,1 myń shaqyrym elektr berý jelisi men 444 qosalqy stantsiiany jóndeýdi tolyq aiaqtaǵan. Jylýmen jabdyqtaý jelilerindegi 377 shaqyrym ýchaske de jóndelgen.
Ministrdiń málimetinshe, atalǵan jumystardy qarjylandyrý kólemi orta eseppen 27%-ǵa artqan. Elektr stantsiialaryn jóndeýge 384 mlrd teńge, elektr jelilerine 393 mlrd teńge, al jylý jelilerine 198 mlrd teńge baǵyttalǵan.
Júrgizilgen jumystardyń nátijesinde tehnologiialyq buzýshylyqtar sany ótken jylmen salystyrǵanda orta eseppen 6%-ǵa azaiǵan. Elektr stantsiialaryndaǵy aqaýlar kórsetkishi 8%-ǵa tómendegen.
Biylǵy jyldyń alǵashqy 10 aiynda elektr energiiasyn óndirý kólemi 102 mlrd kVt·saǵatty qurap, ótken jyldyń sáikes kezeńimen salystyrǵanda 2,3%-ǵa ósken.
Aldaǵy jylytý maýsymynda elektr energiiasyna túsetin eń joǵary júkteme 18 200 MVt deńgeiine jetedi dep boljanyp otyr. Bul ótken maýsymdaǵy eń joǵary kórsetkishten 3%-ǵa artyq.
Kómir qory 4,5 mln tonnaǵa jetti
Energetika ministrliginiń dereginshe, energiia kózderiniń otyn qoimalarynda 5,8 mln tonna kómir jáne 137 myń tonna mazýt jinaqtalǵan. Barlyq stantsiialar normativtik otyn qorymen qamtamasyz etilgen.
Sonymen qatar ministrlik 255 myń tonna kóleminde áleýmettik mazýt jetkizý kestesin bekitken. Jetkizý jumystary qyrkúiek aiynan beri júrgizilip keledi. Osyǵan bailanysty óńir ákimdikterine bekitilgen kesteniń oryndalýyn jedeldetý tapsyrylǵan.
Halyq pen kommýnaldyq-turmystyq sektordyń kómirge qajettiligi biylǵy jylytý maýsymynda 7,3 mln tonnany quraidy. Onyń ishinde 1,6 mln tonna kommýnaldyq-turmystyq sektorǵa, 5,7 mln tonna halyqqa qajet.
Esepti kezeńde óńirlerde 4,5 mln tonna kómir daiyndalǵan. Bul jalpy qajettiliktiń 62%-yna teń. Ministrlik janyndaǵy respýblikalyq shtab kómirmen qamtamasyz etý máselesin baqylaýda ustap otyr. Ákimdikterge qajetti qordy ýaqytyly daiyndap, óńirlerde jasandy dúrbeleńge jol bermeý mindeti júktelgen.
Energetikalyq infraqurylymdy jańartý jalǵasyp jatyr
Jazda «Energetikalyq jáne kommýnaldyq sektorlardy jańǵyrtý» ulttyq jobasy aiasynda birqatar qalada jylý jelileri rekonstrýktsiialanǵan.
Stepnogorsk qalasynda 53 jyl paidalanylǵan 9,5 shaqyrym jylý jelisi jańartylǵan. Taldyqorǵanda 46 jyldyq tarihy bar 3,5 shaqyrym negizgi jylý magistraliniń birinshi kezeńi rekonstrýktsiialanǵan. Petropavlda 1980 jyldan beri paidalanylyp kelgen jylý magistraliniń jalpy uzyndyǵy 4,3 shaqyrym bolatyn eki ýchaskesi jańartylǵan.
Qaraǵandyda tozý deńgeii 81%-dy quraǵan diametri 1020 millimetr jylý magistralin rekonstrýktsiialaý aiaqtalǵan. Jobalarda otandyq óndiristiń energiia tiimdiligi joǵary aldyn ala oqshaýlanǵan qubyrlary qoldanylǵan.
Elektr jelilerin jańartý jumystary da júrgizilgen. Astanada biyl 14 shaqyrym taratý jelisi rekonstrýktsiialanǵan. Bul jelilerge 30 myńnan astam abonent qosylǵan.
Qaraǵandy oblysynda «Josaly» qosalqy stantsiiasy jańartylyp, elektrmen jabdyqtaýdyń rezervtik shemasy jasaqtalǵan. Sondai-aq tozý deńgeii 92%-ǵa jetken Qaraǵaily áýe elektr berý jelisiniń elektr tehnikalyq jabdyqtary tolyq aýystyrylǵan.
Batys Qazaqstan oblysynda da birqatar áýe elektr berý jelisi rekonstrýktsiialanǵan. Jumystar barysynda joǵary temperatýraǵa tózimdi zamanaýi symdar paidalanylǵan.
Ministrlik jylytý maýsymy kezinde stantsiialardaǵy jóndeý jumystaryn aiaqtaý, energetikalyq uiymdarda avariialyq materialdar men jabdyqtardyń qoryn qalyptastyrý jáne otynnyń normativtik deńgeiin saqtaý sharalaryn jalǵastyratynyn málimdedi.
Sonymen qatar avariialyq brigadalardyń tolyq jasaqtalýy men energetikalyq nysandardyń qysqy kezeńge daiyndyǵy baqylaýda bolady.
