Áleýmettik jelide zańdy elemeitinin ashyq kórsetip, ózine eshqandai shara qoldanylmaitynyn málimdegen júrgizýshiniń áreketi jaýapsyz qalmady, dep habarlaidy dalanews.kz.
Politsiia qyzmetkerleri áleýmettik jelide jol qozǵalysy erejelerin óreskel buzǵan videosyn jariialaǵan áieldi anyqtap, jaýapqa tartty.
Videoda áiel qaýipsizdik beldigin taqpai kólik basqarǵany jáne bul talapty oryndaýdan ashyq bas tartqanyn baiqaýǵa bolady. Tekseris barysynda ózge de zańbuzýshylyqtar anyqtaldy. Áiel buǵan deiin sot sheshimimen kólik basqarý quqyǵynan aiyrylǵanyna qaramastan, rólge otyrǵany belgili boldy.
Osyǵan bailanysty oǵan qatysty birneshe ákimshilik quqyqbuzýshylyq deregi boiynsha is qozǵaldy, kólik basqarý quqyǵynan aiyrylǵannan keiin kólik júrgizý, qaýipsizdik beldigin paidalaný talabyn buzý, sot sheshimin oryndamaý jáne jalǵan aqparat taratý boiynsha materialdar rásimdeldi.
Jinaqtalǵan materialdar sotqa joldandy. Kólik arnaiy aiyppul turaǵyna qoiyldy.
Sonymen qatar, kólik basqarý quqyǵynan aiyrylǵan adamǵa kóligin bergen kólik iesi de jaýapkershilikke tartyldy.
