Aqtaýda eki shaǵynaýdannyń turǵyndary kommýnaldyq qyzmetterdiń uzaq ýaqyt boiy bolmaýyna bailanysty narazylyq bildirip, joldy jaýyp tastady. Qazir 20-shaǵynaýdandaǵy bes turǵyn úi áli de elektr jaryǵynsyz otyr, dep habarlaidy dalanews.kz.
Oqiǵa 19A jáne 20-shaǵynaýdandardyń arasyndaǵy jolda bolǵan. Turǵyndardyń aitýynsha, úilerinde jaryq joq ekenine bir táýlikke jýyq ýaqyt ótken. Buǵan qosa, jylý men ystyq sý da berilmei jatyr.
Turǵyndar osylaisha bilik pen jaýapty mekemelerdiń nazaryn máselege aýdarýdy kózdegen. Jariialanǵan beinejazbalardan joldaǵy kólik qozǵalysynyń toqtaǵanyn kórýge bolady. Kepteliste qoǵamdyq kólik te qalyp qoiǵan.
Turǵyndardyń aitýynsha, páterlerdiń ishi sýyp ketken. Olardyń arasynda kishkentai balalary bar otbasylar da bar. Tońazytqyshtar jumys istemei, azyq-túlik buzyla bastaǵan.
«Jaryqtyń qaita qosylǵan kezde kerneýi kúrt kóterilip, turmystyq tehnikalar isten shyǵa ma dep alańdaimyz. Ondai jaǵdaida shyǵyndy kim óteidi? Jaryq buryn da birneshe ret óship, az ýaqytqa qosylǵanymen, qaita sónedi. Jylytqyshtardy paidalanýǵa májbúrmiz. Sonyń saldarynan elektr energiiasyna ketetin shyǵyn kóbeigenimen, páterler báribir sýyq», – deidi №33 úidiń turǵyndary.
Olar ákimdik pen jaýapty mekemelerden elektr jaryǵy, jylý jáne ystyq sý qashan beriletinin túsindirýdi talap etti. Sondai-aq apattyń sebepteri, jóndeý jumystarynyń barysy jáne turmystyq tehnika isten shyqqan jaǵdaida ótemaqy alý tártibi týraly aqparat berýdi surady.
Al «AÝES» memlekettik kommýnaldyq kásipornynyń málimetinshe, qazir 20-shaǵynaýdandaǵy bes turǵyn úi elektr qýatynsyz otyr.
Mekeme mamandary jaryq óshken sátten bastap apattyq-qalpyna keltirý jumystaryn júrgizip jatyr. Alaida qolaisyz aýa raiy men nóser jańbyr saldarynan keibir ýchaskelerdi sý basqan. Sonyń saldarynan zaqymdanǵan kabelder sý astynda qalǵan.
Bul aqaýdy anyqtap, jóndeý jumystaryn júrgizýdi qiyndatyp otyr.
«Qazirgi ýaqytta elektr energiiasyn tolyq qalpyna keltirýdiń naqty merzimin aitý múmkin emes», – dep habarlady kásiporyn.
