Almatyda ekolog-bloger, «Baitaq» jasyldar partiiasynyń burynǵy hatshysy Erlan Qydyrbaev ustaldy. Oǵan memleketten ǵylymi jobalardy qarjylandyrýǵa bólingen qarajatty jymqyrdy degen kúdik bar. Bul týraly jýrnalist Mihail Kozachkov Telegram-arnasynda jazdy, dep habarlaidy dalanews.kz.
Jýrnalistiń málimetinshe, 50 jastaǵy Erlan Qydyrbaev ǵylymi ortada tanymal tulǵalardyń biri. Ol buǵan deiin «Baitaq» partiiasynyń hatshysy bolǵan. Sonymen qatar YouTube arnasyn júrgizip, túrli taqyrypta beinerolikter jariialap, tanymal adamdardan suhbat alǵan.
Kozachkovtyń jazýynsha, Qydyrbaev eki ǵylymi jobamen ainalysqan. Olardyń negizgi maqsaty – qant diabeti, tseliakiia jáne basqa da aýrýlary bar adamdarǵa arnalǵan arnaiy taǵam ónimderiniń óndirisin jolǵa qoiý. Atap aitqanda, gliýtensiz jáne kómirsýy az nan-toqash pen un ónimderin shyǵaratyn tsehtar ashý josparlanǵan.
Bul jobalardy júzege asyrý úshin «Ǵylym qory» aktsionerlik qoǵamy eki kompaniiaǵa júzdegen million teńge bólgen.
Jýrnalistiń derekkózine súiensek, Qydyrbaev atalǵan kompaniialarda jaldamaly qyzmetker retinde tirkelgenimen, is júzinde olardyń jumysyn ózi baqylaǵan degen boljam bar.
Tergeý nusqasy boiynsha, kompaniialar bólingen qarjyǵa jańa óndiristik jabdyqtar satyp alýy kerek bolǵan. Alaida qarajat jetkizýshilerdiń esepshottaryna aýdarylǵanymen, is júzinde buryn paidalanylǵan, tehnikalyq sipattamalarǵa sáikes kelmeitin jabdyqtar satyp alynǵan.
Al qujattarda tehnika jańa ári qymbat baǵaǵa alynǵany kórsetilgen. Jýrnalistiń málimetinshe, satyp alýǵa bólingen qarajat pen naqty jumsalǵan somanyń arasyndaǵy aiyrmashylyq qolma-qol aqshaǵa ainaldyrylyp, Erlan Qydyrbaevqa berilgen bolýy múmkin.
Budan bólek, jobalardyń oryndalyp jatqanyn kórsetý úshin jalǵan jetkizilimder týraly qujattar rásimdelgen degen kúdik bar. Al shyn máninde erekshe taǵamǵa muqtaj adamdarǵa arnalǵan ónimder óndirilmegen.
Qazir bul isti Almaty qalasy boiynsha Ekonomikalyq tergep-tekserý departamenti (ETTD) tergep jatyr.
Mihail Kozachkovtyń málimetinshe, memleketke keltirilgen aldyn ala shyǵyn kólemi shamamen 150 million teńge.
