Qytaidyń China National Offshore Oil Corporation (CNOOC) munai kompaniiasy Atyraý oblysyndaǵy Jylyoi geologiialyq barlaý ýchaskesinde zertteý jumystaryn júrgizip jatyr. Joba aiasynda Kaspii teńiziniń soltústik-shyǵys jaǵalaýyna jaqyn ornalasqan 958 sharshy shaqyrym aýmaq zerttelýde, dep habarlaidy dalanews.kz.
«QazMunaiGaz» ulttyq kompaniiasynyń málimetinshe, qazirgi ýaqytta «Zhylyoi Operating» JShS Jylyoi ýchaskesinde 3D seismikalyq zertteý júrgizip jatyr. Joba «QazMunaiGaz» UK» AQ men Qytaidyń CNOOC kompaniiasynyń seriktestigi aiasynda júzege asyrylýda.
Qytailyq kompaniia úshin bul – Qazaqstan men Ortalyq Aziiadaǵy alǵashqy joba. Zertteý aýmaǵy Atyraý oblysynda, Kaspii teńiziniń soltústik-shyǵys jaǵalaýy boiynda, qurlyqtan teńizge ótpeli aimaqta ornalasqan.
Barlaý jumystarynyń bastapqy kezeńin qytailyq seriktester qarjylandyrady. Zertteýdiń jalpy kólemi 400 tolyq eselik sharshy shaqyrymdy quraidy.
Jobanyń kúrdeliligi ýchaskeniń Kaspii jaǵalaýyndaǵy ornalasýyna bailanysty. Bul ekologiialyq qaýipsizdik talaptaryn qatań saqtaýdy jáne jumystardy joǵary tehnikalyq daiyndyqpen júrgizýdi qajet etedi.
3D seismikalyq barlaý jer qoinaýynyń geologiialyq qurylymy týraly egjei-tegjeili málimet alýǵa múmkindik beredi. Alynǵan nátijeler kómirsýtek áleýetin baǵalaý jáne alǵashqy izdeý-barlaý uńǵymasyn burǵylaityn oryndy tańdaý úshin paidalanylady.
Aita keteiik, joba ázirge munai óndirýdi emes, geologiialyq barlaý jumystaryn qamtidy. Onyń nátijesi ýchaskede kómirsýtek qorynyń bar-joǵyn jáne burǵylaý jumystaryn jalǵastyrý múmkindigin baǵalaýǵa negiz bolady.
