Қазақстанда 350 мыңға жуық тұрмыстық газ баллоны 40-50 жылдан бері пайдаланылып келеді. Оларды шұғыл ауыстыру қажет. Бұл туралы Төтенше жағдайлар министрлігінің жылыту маусымындағы өрт қауіпсіздігіне қатысты баяндамасында айтылды, деп хабарлайды dalanews.kz.
Министрлік мәліметінше, жылыту маусымы басталғаннан бері тұрғын үй секторындағы өрт саны 12%-ға төмендеген. Дегенмен бұл көрсеткіш қауіпсіздік шараларын әлсіретуге негіз болмауы керек.
Өрттің негізгі себептері – ақауы бар пештерді пайдалану, мұржаларды уақтылы тазаламау, электр сымдарының тозуы және электр мен газ желілеріне рұқсатсыз қосылу. Осыған байланысты тұрғындарға қауіпсіздік талаптарын сақтау қажеттігі түсіндіріліп, профилактикалық жұмыстар жүргізіліп жатыр.
Әсіресе халықтың әлеуметтік осал топтарына жататын отбасылардың үйлеріндегі қауіпсіздік мәселесіне ерекше назар аудару қажет. Олардың баспаналарына өрт туралы хабар беретін датчиктер орнату жұмыстары Түркістан, Батыс Қазақстан, Маңғыстау, Жамбыл, Қарағанды облыстары мен Шымкент қаласында тиісті деңгейде жүргізілмей отыр.
Осыған байланысты әкімдіктерге бір апта ішінде әлеуметтік осал санаттағы отбасылардың тізімін нақтылап, үйлерді аралау жұмыстарын жүргізу, анықталған кемшіліктерді жою және датчиктерді сатып алу мен орнатуды қаржыландыру тапсырылды.
Бұдан бөлек, тұрмыстық газ баллондарының қауіпсіздігі өзекті мәселе болып отыр. Министрліктің дерегінше, елімізде шамамен 350 мың газ баллоны 40-50 жылдан бері пайдаланылып келеді. Өткен жылыту маусымында газ баллондарының жарылуына байланысты жеті оқиға тіркелген.
Қазір Көкшетауда газ баллондарын шығаратын зауыт іске қосылған. Атырау мен Алматы қалаларында да осындай өндіріс орындарын ашу жоспарланып отыр. Энергетика министрлігіне бір ай ішінде ескі баллондарды ауыстыру, пайдаланудан шығару және олардың айналымын бақылау тетігін әзірлеу тапсырылды.
Астанада арзан баспана ретінде жалға берілетін 860 нысан өрт қаупі бар нысандар тізіміне енгізілген. Өткен қысқы кезеңде бұл нысандарда 30-ға жуық өрт болған. Осыған байланысты әкімдік, полиция және төтенше жағдайлар қызметтері аталған нысандарды тұрақты тексеріп отыруы қажет.
Министрлік газбен жылытылатын үйлерде газдың таралуын анықтайтын датчиктер орнату, сондай-ақ сертификатталған қазандықтар мен жабдықтарды пайдалану қажеттігін ескертті.
Өрт қауіпсіздігі айлығы қараша айының соңына дейін жалғасады. Оның аясында жатақханалар, хостелдер, білім беру ұйымдары мен адамдар көп жиналатын нысандарға басымдық беріледі. Мәдениет және ақпарат министрлігіне бұқаралық ақпарат құралдары мен әлеуметтік желілер арқылы өрттің алдын алу жөніндегі түсіндіру материалдарын таратуды күшейту тапсырылды.
Төтенше жағдайлар министрлігі профилактикалық жұмыстарды үйлестіреді. Тиісті тапсырмалардың орындалуын бақылау Қанат Бозымбаевқа жүктелді.
