Qazaqstan Travel & Tourism Development Index 2026 halyqaralyq reitinginde 110 eldiń arasynan 56-oryn aldy. Eldiń jalpy kórsetkishi múmkin bolǵan 7 baldyń 4,09-yn qurady, dep habarlaidy dalanews.kz.
Dúniejúzilik ekonomikalyq forým men Zurich Insurance Group ázirlegen zertteý nátijesine sáikes, Qazaqstan Ortalyq Aziia memleketteri arasynda eń joǵary orynǵa jaiǵasqan. Ózbekstan 76-orynnan kórinse, Qyrǵyzstan 93-satyǵa turaqtady. Sonymen qatar Qazaqstan Filippin, Ázerbaijan, Oman, Mysyr jáne Marokko sekildi tanymal týristik baǵyttardy basyp ozdy.
Eldiń kórsetkishi birtindep jaqsaryp keledi. Qazaqstannyń baǵasy 2024 jylmen salystyrǵanda 1,6 paiyz, al pandemiiaǵa deiingi 2019 jylǵy deńgeiden 2,4 paiyz ósken.
Atalǵan indeks týrister sany men salanyń tabysyn tikelei eseptemeidi. Zertteý barysynda elde týrizmdi turaqty damytýǵa qanshalyqty qolaily jaǵdai jasalǵany baǵalanady. Qorytyndy kórsetkish kólik qatynasy, qaýipsizdik, qonaqúi infraqurylymy, sondai-aq tabiǵi jáne mádeni muralardy saqtaý sekildi 17 baǵyttaǵy 102 indikator negizinde shyǵarylǵan.
Álemdik reitingte Japoniia 5,27 balmen birinshi oryn aldy. Odan keiin AQSh - 5,23 ball jáne Ispaniia 5,22 balmen ornalasty. Alǵashqy ondyqqa Avstraliia, Frantsiia, Germaniia, Ulybritaniia, Qytai, Shveitsariia jáne Italiia da endi.
Zertteý avtorlary álemdik týrizm salasy qaita jandanyp kele jatqanyn atap ótti. 2024–2026 jyldar aralyǵynda reitingke qatysqan elderdiń 92 paiyzy kórsetkishin jaqsartqan. Buǵan áýe qatynasynyń keńeiýi, qonaqúi qyzmeti men infraqurylymnyń damýy áser etken.
2025 jyly halyqaralyq týristik saparlar sany rekordtyq deńgeige jetip, 1,5 milliardty qurady. Týrizm salasynyń álemdik ekonomikaǵa qosqan úlesi 11,6 trillion dollarǵa baǵalanyp, sektorda 366 million adam jumyspen qamtyldy.
