Astanada ekolog, zańger jáne qoǵam belsendisi Laýra Malikovanyń ustalǵany týraly aqparat tarady. Áriptesteriniń aitýynsha, ol qazir elordadaǵy arnaiy qabyldaý ornynda bolýy múmkin. Alaida ázirge bul málimet resmi túrde rastalǵan joq, dep habarlaidy dalanews.kz.
Hronika.kz basylymynyń málimetinshe, Malikovanyń ustalǵany týraly aqparatty 9 qarashada onyń áriptesteri habarlaǵan.
Qoǵam belsendisiniń seriktesteri buǵan onyń mitingke qatysýǵa shaqyrǵan jariia málimdemeleri sebep bolýy múmkin dep boljaidy. Olardyń pikirinshe, bul jaǵdai Ákimshilik quqyq buzýshylyq týraly kodekstiń 488-babynyń 7-bóligine qatysty bolýy yqtimal. Atalǵan bap beibit jinalystardy uiymdastyrý jáne ótkizý tártibin buzǵany úshin jaýapkershilikti kózdeidi.
Degenmen, ázirge sot otyrysynyń ótken-ótpegeni jáne oǵan qatysty ákimshilik qamaqqa alý týraly sheshim shyǵarylǵan-shyqpaǵany belgisiz.
Basylymnyń jazýynsha, ekologiialyq qaýymdastyq ókilderi prezident Qasym-Jomart Toqaev pen Bas prokýrorǵa resmi ótinish joldaǵan.
Osyǵan bailanysty DalaNews.kz redaktsiiasy Astana qalasynyń Politsiia departamentine resmi saýal joldaǵan. Redaktsiia ázirge politsiiadan jaýap almaǵan.
Laýra Malikova qandai málimdeme jasaǵan?
Laýra Malikova ekologiia máselelerimen ainalysyp, sý nysandaryn qorǵaý jáne qorshaǵan ortany saqtaý baǵytynda belsendi jumys istep keledi. Ol memlekettik organdardyń qyzmetine qatysty da óz pikirin jii bildiredi.
2 qarashada Malikova áleýmettik jelidegi paraqshasynda bilikti synap, miting ótkizýge shaqyrǵan video jariialaǵan. Jazba qoǵamda keńinen talqylandy. Video shamamen 1,4 million ret qaralyp, 50 myńǵa jýyq laik jinaǵan. Sondai-aq 30 myńnan astam ret bólisilgen.
Óz úndeýinde qoǵam belsendisi Qazaqstandaǵy áleýmettik-ekonomikalyq saiasatty synǵa alǵan. Ol áleýmettik kómek taǵaiyndaý kezinde azamattardy tabys deńgeiine qarai bólýdi, qosylǵan qun salyǵynyń (QQS) ósýin jáne biliktiń bizneske qatysty sheshimderin qoldamaitynyn aitqan.
Malikovanyń pikirinshe, mundai sharalar orta taptyń azaiýyna jáne halyqtyń turmys jaǵdaiynyń nasharlaýyna ákelýi múmkin.
Áleýmettik jeli qoldanýshylary ne deidi?
Malikovanyń videosy jariialanǵannan keiin keibir qoldanýshylar onyń qaýipsizdigine alańdaýshylyq bildirgen. Olar bilikke qatysty ashyq aitylǵan syni pikirler qoǵam belsendisine qiyndyq týdyrýy múmkin dep qaýiptengen.
Qazir jazylýshylary onyń áleýmettik jelide kórinbei ketkenin aityp, qaida ekenine alańdap otyr. Alaida Malikovanyń paraqshasyndaǵy belsendiliktiń toqtaýy onyń ustalǵany týraly aqparatpen bailanysty ma, joq pa — belgisiz.
Material jariialanǵan sátte Laýra Malikovanyń ustalǵany týraly aqparatqa qatysty resmi rastaý nemese teriske shyǵarý bolǵan joq.
