Qazaqtyń belgili ánshisi, "Aqbaian" atanǵan marqum Mádina Eralievanyń uly Arsen Eraliev anasynyń qaitys bolǵanyn qalai estigenin aityp berdi. Ol arada qansha jyl ótse de, sol kúnniń aýyr estelikteri jadynan óshpegenin jetkizdi, dep habarlaidy dalanews.kz.
Arsen Eraliev "Astarly aqiqat" baǵdarlamasynda anasynyń ómirden ótken sátin eske alyp, jan syryn aqtardy.
Onyń aitýynsha, 2000 jyldyń qarasha aiynda bolǵan qaiǵyly oqiǵa ómirin túbegeili ózgertken. Anasynyń qazasy týraly habardy oǵan belgili ánshi Naǵima Esqalieva men jaqyn tanystary jetkizgen.
"2000 jyldyń qarasha aiy áli kúnge deiin esimde. Naǵima Esqalieva men anamnyń dostary Salman men Aleksei kelip, anamnyń ólimin estirtti. Basynda senbedim. Óń men tús arasynda júrgendei boldym. Úige adamdar jinala bastady. Búkil ánshiler, týysqandar kele bastady", – dedi Arsen Eraliev.
Ol qaraly habardy estigen alǵashqy sátte bolǵan jaǵdaiǵa sene almaǵanyn aitty. Keiin úiine týystary men óner adamdary jinala bastaǵan.
Arsen Eraliev anasynyń denesin alyp kelý úshin Qyzylorda oblysyna arnaiy barǵanyn da eske aldy.
"Sosyn biz Qyzylordanyń Baiqońyr óńirine charterlik reispen ushyp kettik. Anamnyń denesin sol jerden ózim alyp keldim. Áli kúnge deiin anamnyń kúshin sezemin. Ol meni árdaiym jelep-jebep júredi. Ýaqyt ótken saiyn saǵyna beremin", – dedi ol.
Ánshiniń uly jyldar ótken saiyn anasyna degen saǵynyshy kúsheie túsetinin jasyrmady. Onyń sózinshe, Mádina Eralievanyń rýhani qoldaýyn áli kúnge deiin sezinedi.
Mádina Eralieva kim?
Mádina Eralieva – qazaq estradasynyń belgili ánshisi, Qazaqstannyń eńbek sińirgen ártisi. Ol halyq arasynda "Qazaqtyń Aqbaiany" degen atpen tanylǵan.
Ánshi ulttyq án ónerindegi ózindik oryndaýshylyq mánerimen jáne erekshe daýysymen kópshiliktiń yqylasyna bólengen.
Mádina Eralieva 2000 jyldyń qarasha aiynda jol-kólik oqiǵasy saldarynan ómirden ótti.
Óner iesiniń mezgilsiz qazasy qazaq óneri úshin aýyr qaiǵy boldy. Onyń oryndaýyndaǵy ánder kúni búginge deiin tyńdarman jadynda saqtalyp keledi.
