Qazaqstanda klimattyń jylynýyna bailanysty jylytý maýsymynyń bastalý jáne aiaqtalý ýaqyty qaita qaralýy múmkin. Bul týraly Energetika ministri Erlan Aqkenjenov aitty, dep habarlaidy dalanews.kz.
Ministrdiń sózinshe, kei kúnderi úilerge qajetti mólsherden artyq jylý beriledi. Páter ishi ysyp ketken soń turǵyndar terezesin ashýǵa májbúr bolady. Osylaisha úidi jylytýǵa arnalǵan energiianyń bir bóligi dalaǵa ketip, jylý tiimsiz jumsalady.
"Keide úidi emes, aýany jylytyp jatqandai bolamyz. Páterler ystyq bolǵandyqtan, adamdar terezesin ashady. Osylaisha jylý syrtqa shyǵyp ketedi", – dedi ministr.
Qazir jylý berý deńgeii syrttaǵy aýa temperatýrasyna qarai retteledi. Eger aldaǵy ýaqytta kún raiy jyly bola berse, jylytý maýsymynyń bastalý jáne aiaqtalý merzimi de qaita qaralýy múmkin.
Erlan Aqkenjenov Astanadaǵy biylǵy aýa raiyn mysalǵa keltirdi. Qarasha aiynyń ortasy jaqyndasa da, elordada turaqty qar áli túspegen. Aýa temperatýrasy nebári minýs 5 gradýsqa deiin tómendegen. Al buǵan deiin osy mezgilde minýs 10-15 gradýs aiaz bolady dep boljanǵan.
