Premer-ministr Oljas Bektenov óńir ákimderine jylytý maýsymynda turǵyndardyń shaǵymdaryna jedel áreket etýdi tapsyrdy. Úkimet basshysy qys mezgilinde apattyq brigadalar men arnaiy tehnikanyń tolyq daiyn bolýyn talap etti, dep habarlaidy dalanews.kz.
10 qarashada ótken Úkimet otyrysynda Oljas Bektenov elimizdiń barlyq óńirinde jylytý maýsymy bastalǵanyn atap ótti.
Onyń aitýynsha, jaz ailarynda jylý jáne elektr jelilerin jóndeý, qajetti jabdyqtardy daiyndaý jumystary júrgizilgen. Tutynýshylarǵa jylý bekitilgen kestege sáikes berilgen. Alaida birqatar qalada jylýmen qamtamasyz etýge qatysty máseleler týyndaǵan. Atap aitqanda, Aqtaý, Pavlodar jáne Petropavl turǵyndarynan jylý sapasyna bailanysty shaǵymdar túsken.
Osyǵan bailanysty Premer-ministr óńir basshylaryna jylytý maýsymyna jaýapty shtabtardyń jumysyn kúsheitýdi mindettedi.
"Óńir ákimderine jylý berý maýsymyna jaýapty óńirlik shtabtardyń jumysyn kúsheitip, halyqtyń aryz-shaǵymdaryna jedel áreket etýdi tapsyramyn. Qys ailaryndaǵy jumystarǵa avariialyq brigadalar men arnaiy tehnikany tolyq jumyldyrý qajet", – dedi Oljas Bektenov.
Úkimet basshysy ásirese áleýmettik nysandardy turaqty ári sapaly jylýmen qamtamasyz etýge erekshe nazar aýdarý qajettigin atap ótti. Sonymen qatar óńir ákimdikterine turǵyndar úshin kómir baǵasynyń turaqtylyǵyn jáne onyń qoljetimdi bolýyn qadaǵalaý tapsyryldy.
"Sonymen qatar óńir ákimdikteri halyqqa qajetti kómirdiń turaqty baǵamen qoljetimdi bolýyn baqylaýda ustasyn. Energetika ministrligi men óńir ákimdikteri energiia kózderindegi jóndeý jumystaryn bekitilgen kestege sáikes aiaqtap, qajetti jabdyqtar rezervin ázirleýge tiis", – dep atap ótti Premer-ministr.
Oljas Bektenovtiń tapsyrmasyna sáikes, jaýapty memlekettik organdar jylytý júielerindegi jóndeý jumystaryn ýaqytyly aiaqtap, yqtimal apattardy joiýǵa qajetti qural-jabdyq qoryn daiyndaýǵa tiis. Al qysqy jylytý maýsymyna qatysty jumystardy jalpy úilestirý Premer-ministrdiń birinshi orynbasary Nurlybek Nálibaevqa júkteldi.
