Batys Qazaqstan oblysynda politsiia «Jariia» qoǵamdyq birlestiginiń basshylaryna qatysty alaiaqtyq deregi boiynsha tekserýdi bastady, dep habarlaidy dalanews.kz.
Politsiianyń málimetinshe, qylmystyq isti bastaýǵa qoǵamdyq birlestik basshylarynyń yqtimal alaiaqtyq áreketterine tap bolǵanyn málimdegen eki azamattyń aryzy sebep bolǵan. Ótinish berýshiler uiymnyń qyzmetine qatysqan kezeńde ózderiniń jeke qarajatynan aiyrylyp, sonyń saldarynan materialdyq shyǵynǵa ushyraǵan alǵa tartady.
Áńgime birlestik qatysýshylary arasynda uiymdy jarnamalaý men ilgeriletýge arnalǵan qarajat jinaý, sondai-aq túrli is-sharalarǵa qatysýǵa bailanysty jol júrý, tamaqtaný jáne turý shyǵyndaryn óz qarajaty esebinen tóleý týraly bolyp otyr. Aryzdanýshylardyń sózinshe, uiym basshylyǵy jumsalǵan qarajatty birneshe ret ótep berýge ýáde etken, alaida aqshany áli kúnge deiin qaitarmaǵan.
«Aryzdanýshylardyń túsiniktemesine sáikes, anyqtalǵan tulǵalar qoǵamdyq birlestiktiń ókilderi bola otyryp, uiym qyzmet etken kezeńde olardyń aqshalai qarajatyn iemdengen. Atalǵan derek boiynsha qylmystyq is qozǵaldy», – delingen Batys Qazaqstan oblysy Politsiia departamentiniń túsiniktemesinde.
Politsiianyń habarlaýynsha, qazirgi ýaqytta oqiǵanyń mán-jaiyn anyqtaýǵa jáne aryzdanýshylardyń ýájderin tekserýge baǵyttalǵan qajetti tergeý áreketteri júrgizilip jatyr. Tergeý aiasynda iske qatysy bar barlyq tulǵanyń áreketine quqyqtyq baǵa beriledi.
