Qazaqstanda Eýraziialyq ekonomikalyq odaqtyń kedendik shekarasy arqyly ótkiziletin qolma-qol aqsha men aqsha quraldaryn ýaqytsha ustap qalý tártibi ózgeredi. Jańa talaptar 2026 jylǵy 20 qarashadan bastap kúshine enedi, dep habarlaidy dalanews.kz.
Qarjy ministriniń 5 qarashadaǵy buiryǵyna sáikes, memlekettik kirister organdary endi ulttyq qaýipsizdik organdarynan alynǵan aqparatty da eskeretin bolady. Buǵan deiin mundai sheshim quqyq qorǵaý organdary men Qarjylyq monitoring agenttigi usynǵan málimetter negizinde qabyldanatyn.
Eger shekara arqyly ótkiziletin qarajattyń qylmystyq jolmen alynǵan kiristerdi zańdastyrýǵa, terrorizmdi nemese jappai qyryp-joiý qarýyn taratýdy qarjylandyrýǵa qatysy bolýy múmkin degen aqparat tússe, qolma-qol aqsha men aqsha quraldarynyń qozǵalysy ýaqytsha toqtatylýy múmkin.
Bul rette jańa norma shekaradan ótkizilgen barlyq aqsha avtomatty túrde tárkilenedi degendi bildirmeidi. Qarajat tek ýákiletti organdardan naqty aqparat túsken jaǵdaida jáne zańda belgilengen tártippen ustalady.
Aqsha quraldaryna jol chekteri, vekselder, bank chekteri jáne tólem alýshy kórsetilmegen qujattyq baǵaly qaǵazdar jatady. Ustap qalynǵan qarajatty tiisti organǵa berý suraý salý negizinde júrgiziledi. Rásimge aqshanyń saqtalýyna jaýapty qyzmetker qatysyp, qarajatty berý týraly akt eki danada toltyrylady.
