Қазақстанда Еуразиялық экономикалық одақтың кедендік шекарасы арқылы өткізілетін қолма-қол ақша мен ақша құралдарын уақытша ұстап қалу тәртібі өзгереді. Жаңа талаптар 2026 жылғы 20 қарашадан бастап күшіне енеді, деп хабарлайды dalanews.kz.
Қаржы министрінің 5 қарашадағы бұйрығына сәйкес, мемлекеттік кірістер органдары енді ұлттық қауіпсіздік органдарынан алынған ақпаратты да ескеретін болады. Бұған дейін мұндай шешім құқық қорғау органдары мен Қаржылық мониторинг агенттігі ұсынған мәліметтер негізінде қабылданатын.
Егер шекара арқылы өткізілетін қаражаттың қылмыстық жолмен алынған кірістерді заңдастыруға, терроризмді немесе жаппай қырып-жою қаруын таратуды қаржыландыруға қатысы болуы мүмкін деген ақпарат түссе, қолма-қол ақша мен ақша құралдарының қозғалысы уақытша тоқтатылуы мүмкін.
Бұл ретте жаңа норма шекарадан өткізілген барлық ақша автоматты түрде тәркіленеді дегенді білдірмейді. Қаражат тек уәкілетті органдардан нақты ақпарат түскен жағдайда және заңда белгіленген тәртіппен ұсталады.
Ақша құралдарына жол чектері, вексельдер, банк чектері және төлем алушы көрсетілмеген құжаттық бағалы қағаздар жатады. Ұстап қалынған қаражатты тиісті органға беру сұрау салу негізінде жүргізіледі. Рәсімге ақшаның сақталуына жауапты қызметкер қатысып, қаражатты беру туралы акт екі данада толтырылады.
