Батыс Қазақстан облысында полиция «Жария» қоғамдық бірлестігінің басшыларына қатысты алаяқтық дерегі бойынша тексеруді бастады, деп хабарлайды dalanews.kz.
Полицияның мәліметінше, қылмыстық істі бастауға қоғамдық бірлестік басшыларының ықтимал алаяқтық әрекеттеріне тап болғанын мәлімдеген екі азаматтың арызы себеп болған. Өтініш берушілер ұйымның қызметіне қатысқан кезеңде өздерінің жеке қаражатынан айырылып, соның салдарынан материалдық шығынға ұшыраған алға тартады.
Әңгіме бірлестік қатысушылары арасында ұйымды жарнамалау мен ілгерілетуге арналған қаражат жинау, сондай-ақ түрлі іс-шараларға қатысуға байланысты жол жүру, тамақтану және тұру шығындарын өз қаражаты есебінен төлеу туралы болып отыр. Арызданушылардың сөзінше, ұйым басшылығы жұмсалған қаражатты бірнеше рет өтеп беруге уәде еткен, алайда ақшаны әлі күнге дейін қайтармаған.
«Арызданушылардың түсініктемесіне сәйкес, анықталған тұлғалар қоғамдық бірлестіктің өкілдері бола отырып, ұйым қызмет еткен кезеңде олардың ақшалай қаражатын иемденген. Аталған дерек бойынша қылмыстық іс қозғалды», – делінген Батыс Қазақстан облысы Полиция департаментінің түсініктемесінде.
Полицияның хабарлауынша, қазіргі уақытта оқиғаның мән-жайын анықтауға және арызданушылардың уәждерін тексеруге бағытталған қажетті тергеу әрекеттері жүргізіліп жатыр. Тергеу аясында іске қатысы бар барлық тұлғаның әрекетіне құқықтық баға беріледі.
