Qazaqstanda páterler men jeke úilerdi tabiǵi apattardan mindetti saqtandyrý júiesin engizý josparlanyp otyr. Qarjy naryǵyn retteý jáne damytý agenttiginiń málimetinshe, qazir elimizdegi turǵyn úi qorynyń nebári 3,2 paiyzy ǵana saqtandyrylǵan. Al Qazaqstan aýmaǵynyń shamamen 75 paiyzy tabiǵi apattar qaýpine ushyraýy múmkin, dep habarlaidy dalanews.kz.
Bul bastama XIV Qazaqstan qarjygerler kongresinde tanystyrylǵan 2026–2030 jyldarǵa arnalǵan saqtandyrý naryǵyn damytý baǵdarlamasyna engizilgen. Baǵdarlamada jalpy sany 18 bastama qarastyrylǵan.
Agenttik tóraǵasynyń orynbasary Nurjan Tursynhanovtyń aitýynsha, mindetti saqtandyrý júiesi tabiǵi apat saldarynan turǵyn úige kelgen shyǵyndy óteý tetigin qalyptastyrýǵa baǵyttalǵan. Qazir mundai jaǵdailarda azamattarǵa kómek kórsetý shyǵyndarynyń edáýir bóligin memleket kóteredi. Jańa júie boiynsha ótemaqy qarajaty aldyn ala jinalatyn saqtandyrý jarnalary esebinen qalyptastyrylmaq.
Alaida ázirge bul – retteýshiniń usynysy men jospary. Mindetti saqtandyrý kúshine engen joq.
Avtosaqtandyrý tártibi de ózgerýi múmkin
Baǵdarlama aiasynda kólik ielerine qatysty saqtandyrý júiesin de jańartý kózdelgen.
Qazir jol-kólik oqiǵasynan zardap shekken azamat ótemaqy alý úshin apatqa kináli júrgizýshiniń saqtandyrý kompaniiasyna júginedi. Bolashaqta oǵan óz saqtandyrý kompaniiasynan tólem alýǵa múmkindik berilmek. Al saqtandyrý uiymdary ózara esep aiyrysýdy ózderi júrgizedi.
Sonymen qatar kólik ielerine búlingen avtokólik úshin aqshalai ótemaqy alý nemese saqtandyrý kompaniiasymen jumys isteitin tehnikalyq qyzmet kórsetý stantsiiasynda jóndetý múmkindigi usynylmaq.
Jóndeý qunyna qatysty daýlardy azaitý úshin qosalqy bólshekter men jóndeý jumystary baǵasynyń biryńǵai anyqtamalyǵy jasalady.
Mindetti saqtandyrý polisteriniń baǵasyn belgileý tártibin ózgertý de usynylyp otyr. Retteýshi tarifterdiń belgili bir shegin bekitip, onyń aiasynda saqtandyrý kompaniialaryna klienttiń jeke táýekelderine qarai baǵa belgileýge múmkindik berýdi kózdeidi.
Zeinetaqy annýitetteriniń jańa túrleri usynylady
Baǵdarlamada óndiristegi jazataiym oqiǵalardan qyzmetkerlerdi saqtandyrý tártibin jetildirý de qarastyrylǵan. Kásibi táýekelderdi baǵalaý jáne saqtandyrý polisiniń qunyn esepteý tásilderi ózgerýi múmkin.
Budan bólek, zeinetaqy annýitetteriniń jańa túrlerin engizý josparlanyp otyr. Olar ómir boiy tólenetin kepildendirilgen tólemder men investitsiialyq tabysty biriktiredi. Klientter osy eki bóliktiń úlesin ózderi tańdai alady.
Saqtandyrý deldaldarynyń qyzmetine de talap kúsheitilmek. Endi kompaniialar saqtandyrý agentiniń polisti rásimdegeni úshin alatyn komissiia mólsherin shartta kórsetýge mindetteledi. Sondai-aq saqtandyrý jaǵdailaryn rásimdeýge jáne tólem alýǵa kómektesetin deldaldardy mindetti tirkeý jáne olarmen jazbasha kelisimshart jasaý talaptary engizilmek.
Saqtandyrý qyzmetterin tsifrlandyrý da josparlanǵan. Biryńǵai saqtandyrý derekter bazasyn damytý jáne saqtandyrý marketpleisteriniń quqyqtyq mártebesin zańmen bekitý kózdelip otyr. Bul platformalar arqyly azamattar túrli kompaniialardyń usynystaryn salystyryp, polisti onlain tańdai alady.
Qazaqstanda saqtandyrý naryǵy qanshalyqty ósti?
Qarjy naryǵyn retteý jáne damytý agenttiginiń dereginshe, 2022 jyldyń basynan beri saqtandyrý kompaniialarynyń aktivteri 1,8 trillion teńgeden 4,8 trillion teńgege deiin ósken.
Osy kezeńde saqtandyrý syilyqaqylarynyń kólemi 591,7 milliard teńgeden 1,4 trillion teńgege, al klientterge tólengen ótemaqy 135,9 milliard teńgeden 417,9 milliard teńgege jetken.
Soǵan qaramastan, Qazaqstanda saqtandyrý qyzmetin paidalaný deńgeii áli de tómen. 2025 jyldyń qorytyndysy boiynsha saqtandyrý syilyqaqylarynyń kólemi eldiń jalpy ishki óniminiń 1,22 paiyzyna teń bolǵan. Damýshy elderdegi ortasha kórsetkish – 2,7 paiyz, al damyǵan memleketterde – 6,7 paiyz.
Saqtandyrý naryǵyn damytýdyń 2026–2030 jyldarǵa arnalǵan baǵdarlamasyn iske asyrý úshin jańa zań jobasy ázirlengen. Ony jyl sońyna deiin Quryltaidyń qaraýyna engizý josparlanyp otyr.
