2026 jyldyń alǵashqy toǵyz aiynda Qazaqstanda qant diabetiniń 32 342 jaǵdaiy anyqtaldy. Skriningtik tekserýden 1,6 millionnan astam azamat ótken. Anyqtalǵan naýqastardyń shamamen 95 paiyzy turaqty meditsinalyq baqylaýǵa alynǵan, dep habarlaidy dalanews.kz.
Densaýlyq saqtaý salasynyń málimetinshe, 2026 jylǵy 1 qazandaǵy jaǵdai boiynsha elimizde qant diabetimen aýyratyn 575 myńnan astam adam tirkelgen. Onyń ishinde 30 987 adamda aýrýdyń birinshi tipi anyqtalǵan.
14 qarasha – Dúniejúzilik diabetpen kúres kúni. Dúniejúzilik densaýlyq saqtaý uiymynyń dereginshe, búginde álemde 800 millionnan astam eresek adam osy aýrýmen ómir súredi.
Qazaqstanda diabetti erte anyqtaý maqsatynda 40 pen 76 jas aralyǵyndaǵy azamattarǵa arnalǵan tegin profilaktikalyq skrining keńeitilgen. Tekserý eki jylda bir ret júrgizilip, qandaǵy glikirlengen gemoglobin men lipidter deńgeiin anyqtaýdy qamtidy.
Sonymen qatar elimizde endokrinologiia jáne diabet boiynsha quzyret ortalyqtary ashylyp, olardyń filialdary Almaty, Qaraǵandy, Qyzylorda, Soltústik Qazaqstan, Túrkistan jáne Aqtóbe oblystarynda jumys isteidi. 2027 jyldyń sońyna deiin mundai ortalyqtardy barlyq óńirde ashý josparlanyp otyr.
Qant diabetimen aýyratyn azamattar memleket esebinen insýlin, qant deńgeiin tómendetetin preparattar jáne gliýkozany baqylaýǵa arnalǵan meditsinalyq quraldarmen qamtamasyz etiledi. 2026 jyly MÁMS qarajaty esebinen osy maqsatqa 60,46 milliard teńge bólingen.
