Qazaqstan Respýblikasy ǵylym jáne joǵary bilim vitse-ministri Gúlzat Kóbenova qyzmetinen ketti. Tiisti sheshimdi Úkimet qabyldady, dep habarlaidy dalanews.kz.
Bul týraly 14 qarashada Qazaqstan Respýblikasy Úkimetiniń baspasóz qyzmeti málimdedi.
«Qazaqstan Respýblikasy Úkimetiniń qaýlysymen Gúlzat Izbasarqyzy Kóbenova ǵylym jáne joǵary bilim vitse-ministri qyzmetinen bosatyldy», – delingen resmi habarlamada.
Ázirge onyń qyzmetinen bosatylý sebebi men ornyna kim taǵaiyndalatyny týraly aqparat jariialanǵan joq.
Gúlzat Kóbenova kim?
Gúlzat Izbasarqyzy Kóbenova 1978 jyly Aqtóbe oblysynda dúniege kelgen. Ol Q. Jubanov atyndaǵy Aqtóbe memlekettik ýniversiteti men E.A. Bóketov atyndaǵy Qaraǵandy memlekettik ýniversitetin támamdaǵan.
Eńbek jolyn 1998 jyly Q. Jubanov atyndaǵy Aqtóbe memlekettik ýniversitetiniń tarih kafedrasynda oqytýshy bolyp bastaǵan.
2002–2009 jyldar aralyǵynda Aqtóbe memlekettik ýniversiteti men Aqtóbe pedagogikalyq institýtynda túrli basshylyq qyzmetter atqarǵan.
2009–2010 jyldary Qazaqstan Respýblikasy Mádeniet jáne aqparat ministrligi Aqparat jáne muraǵat komitetiniń aqparat basqarmasynda sarapshy jáne basqarma basshysy bolyp eńbek etti.
2010–2018 jyldary Bilim jáne ǵylym ministrliginde birqatar jaýapty laýazymdardy atqardy.
2018–2019 jyldary Qazaqstan Respýblikasynyń Tuńǵysh Prezidenti – Elbasy Nursultan Nazarbaev kitaphanasy direktorynyń orynbasary qyzmetinde boldy.
2019 jyldyń qańtarynan qyrkúiegine deiin Qazaqstan Respýblikasy Prezidenti Keńsesinde sektor meńgerýshisi jáne inspektor bolyp jumys istedi.
2019 jyldyń qyrkúieginen 2020 jyldyń qańtaryna deiin Bilim jáne ǵylym ministrliginiń Bilim jáne ǵylym salasyndaǵy baqylaý komitetin basqardy.
2020–2022 jyldary atalǵan ministrliktiń Bilim jáne ǵylym salasynda sapany qamtamasyz etý komitetiniń tóraǵasy qyzmetin atqardy.
2022–2023 jyldary Ǵylym jáne joǵary bilim ministrliginiń Ǵylym jáne joǵary bilim salasyndaǵy sapany qamtamasyz etý komitetiniń tóraǵasy boldy.
2023 jyldan bastap Ǵylym jáne joǵary bilim ministrliginiń Joǵary jáne joǵary oqý ornynan keiingi bilim komitetin basqarǵan.
Gúlzat Kóbenova bilim berý júiesi men memlekettik basqarý salasynda uzaq jyl eńbek etken laýazymdy tulǵalardyń biri.
