Shyǵys Qazaqstan oblysynyń Zaisan aýdanyndaǵy «Shaǵanoba» arheologiialyq kesheninde jer qazý jumystary júrgizilgen. Áleýmettik jelilerde tarihi eskertkishterge zaqym kelýi múmkin ekeni týraly aqparat taraǵannan keiin oqiǵa ornyna politsiia men tarihi-mádeni murany qorǵaý mamandary barǵan. Bul týraly Shyǵys Qazaqstan oblysynyń ákimdigi málimdedi, dep habarlaidy dalanews.kz.
Ákimdiktiń málimetinshe, 2026 jylǵy 13 qarashada politsiia qyzmetkerleri oqiǵa ornyna baryp, keshen aýmaǵynda qazylǵan shuńqyrlardy «SRS» JShS-ne tiesili tehnikanyń kómegimen kómý jumystary júrgizilgenin anyqtaǵan.
Oqiǵa ornyndaǵy azamattardyń jeke basy anyqtalyp, tiisti materialdar politsiiada tirkelgen.
Sol kúni tarihi-mádeni murany qorǵaý mamandary, arheologtar, ákimdik pen politsiia ókilderi aýmaqty birlesip teksergen. Jer qazý izderi foto jáne beinejazbaǵa túsirilip, arnaiy akt jasalǵan.
Alaida qar jamylǵysyna bailanysty qorǵandardyń qazirgi jai-kúii men yqtimal zalal kólemin tolyq anyqtaý múmkin bolmaǵan.
Qorǵandar kóktemde qaita tekseriledi
Ákimdik málimetinshe, 2027 jyldyń kókteminde arheologiialyq keshen aýmaǵyna qosymsha tekserý júrgiziledi. Qajet bolǵan jaǵdaida avariialyq-qutqarý arheologiialyq jumystary uiymdastyrylady.
Sonymen qatar oqiǵanyń mán-jaiyna quqyqtyq baǵa berý úshin tekserý materialdaryn quqyq qorǵaý organdaryna joldaý tapsyrylǵan. Zań buzýshylyq anyqtalǵan jaǵdaida kináli tulǵalardy jaýapqa tartý sharalary qabyldanady.
Qazir tarihi eskertkishterdi zańsyz qazý men vandalizm áreketteriniń aldyn alý maqsatynda baqylaý kúsheitilip jatyr.
Óńirde ashyq aspan astyndaǵy mýzei kesheni qurylýy múmkin
Oblys ákimdigi «Shaǵanoba» qorǵandarynyń tabiǵi qalpy men tarihi kelbetin saqtai otyryp, aýmaqta zamanaýi ashyq aspan astyndaǵy mýzei keshenin qurý múmkindigin de qarastyryp jatyr. Bul másele ázirge kelisý satysynda.
Josparlanǵan bastama tarihi jádigerlerdi kópshilikke tanystyrýǵa, ǵylymi zertteýler júrgizýge jáne óńirdiń arheologiialyq murasyn saqtaýǵa baǵyttalǵan.
Ákimdik arheologiialyq murany zertteý men saqtaý jumystary Shilikti, Berel, Eleke sazy jáne Aqbaýyr eskertkishterinde jinaqtalǵan tájiribege súiene otyryp jalǵasatynyn atap ótti.
«Tarihi muraǵa qol suǵýǵa jol berilmeidi. Osy máselege qatysty barlyq jumys Shyǵys Qazaqstan oblysy ákimdiginiń baqylaýynda», – delingen resmi aqparatta.