Qazaqstan mektepterinde psiholog mamandardyń eńbekaqysy ósedi

Qazaqstan mektepterinde psiholog mamandardyń eńbekaqysy ósedi
gov.kz

Qazaqstan mektepterindegi pedagog-psihologtarǵa shamamen 60 myń teńge kóleminde qosymsha ústemeaqy tólenedi. Bul týraly Oqý-aǵartý ministri Juldyz Súleimenova Quryltaida ótken Úkimet saǵatynda málimdedi, dep habarlaidy dalanews.kz.

Ministrdiń aitýynsha, balalardyń quqyǵyn qorǵaý jáne býllingtiń aldyn alý baǵytynda birqatar jańa tetik engizilgen. Biyl 20 óńirde balalardyń quqyqtaryn qorǵaý jónindegi basqarmalar qurylyp, onda 200-den astam maman jumys istep jatyr.

Sonymen qatar 2023 jyly qabyldanǵan zań negizinde úsh jyldan beri psihologiialyq qoldaý ortalyqtary qyzmet kórsetedi.

Juldyz Súleimenova atap ótkendei, «Qazaqstan balalary» tujyrymdamasy aiasynda 158 is-shara qarastyrylǵan. Olar býllingke tap bolǵan balalardy psihologiialyq-pedagogikalyq súiemeldeýdi jáne ómirlik qiyn jaǵdaiǵa tap bolǵan kámeletke tolmaǵandarǵa jeke qoldaý kórsetýdi qamtidy.

Sondai-aq mamandarǵa býllingtiń aldyn alý, qatty psihologiialyq kúizeliske túsken nemese daǵdarystyq jaǵdaiǵa tap bolǵan balalarǵa kómek kórsetý jóninde ádistemelik usynymdar ázirlengen. Bul materialdar elimizdegi 8 myńǵa jýyq mekteptiń psihologtaryna jetkizilgen.

Ministr mektepterdegi psiholog mamandardyń tapshylyǵyn joiý jáne olardyń biliktiligin arttyrý baǵytynda da jumys júrgizilip jatqanyn aitty.

«Buǵan deiin psihologterimizdiń jalaqysy óte tómen boldy, sondyqtan mamandar bul qyzmette turaqtamady. Biyl Oqý-aǵartý ministrligi Úkimettiń qoldaýymen osy máseleniń sheshimin tapty», - dedi Juldyz Súleimenova.

Onyń sózinshe, mektepterde «Jeke qaýipsizdik» páni engizilgen. Osy pán aiasynda pedagog-psihologtarǵa oqý saǵattary qarastyrylǵan. Soǵan bailanysty olarǵa shamamen 60 myń teńge kóleminde qosymsha ústemeaqy esepteledi.