Jalaqy milliondap tólenedi, nátije kóńil kónshitpeidi: QFF basshylyǵy synǵa qaldy

Jalaqy milliondap tólenedi, nátije kóńil kónshitpeidi: QFF basshylyǵy synǵa qaldy
Foto: JI

Qazaqstan fýtbol federatsiiasyndaǵy qarjylai máseleler men ulttyq quramanyń sátsiz oiyndary qoǵamda qyzý talqylanyp jatyr. Jýrnalist Mihail Kozachkov federatsiia basshylyǵyndaǵy ózgeristerge, sheteldik mamandardyń qyzmetine jáne uiym tóńiregindegi qarjylai daýlarǵa nazar aýdardy. Onyń sózinshe, fýtboldy damytýǵa jaýapty qurylymdaǵy qomaqty jalaqy men ótemaqylar ulttyq quramanyń nátijesine sai kelmeidi, dep habarlaidy dalanews.kz.

Buǵan Moldova quramasynan 2:1 esebimen jeńilýi sebep bolǵan. Jýrnalist Qazaqstan fýtbolyndaǵy maýsym qorytyndysyn saralap, federatsiia basshylyǵynyń jumysyna qatysty birqatar máseleni kóterdi.

"Qazaqstan fýtbol quramasy Ulttar ligasyndaǵy uiatty ónerin jalǵastyryp jatyr. Keshe bizdiń úzdik fýtbolshylar Kishinevtiń kórikti jerlerin aralap, Moldova quramasynan 2:1 esebimen jeńilip qaitty", – dep jazdy Mihail Kozachkov.

Basshylyq aýysty, biraq nátije kóńil kónshitpeidi

Jýrnalistiń jazýynsha, biyl kóktemde Qazaqstan fýtbol federatsiiasynyń basshylyq quramynda eleýli ózgerister bolǵan. Atap aitqanda, uiymnyń bas hatshysy qyzmetine Ulybritaniia azamaty Skott Mann taǵaiyndalǵan.

Al jazda ulttyq quramanyń bas bapkeri Talǵat Baisýfinov qyzmetinen ketti. Ol mundai sheshim qabyldaýyna kásibi mindetterin tolyqqandy atqarýǵa qajetti jaǵdaidyń jasalmaýy sebep bolǵanyn málimdegen.

"Alǵa qoiylǵan mindetterdi oryndaý úshin qajetti kásibi jaǵdailar joq", – degen edi Baisýfinov.

Onyń ornyna niderlandylyq maman Djon van ’t Ship keldi. Kozachkov bul taǵaiyndaýdy federatsiianyń jańa bas hatshysy Skott Mannmen bailanystyrady.

Alaida bapkerler quramyndaǵy ózgerister ázirge ulttyq komandanyń nátijesine oń áser etpegen.

Jýrnalist keltirgen málimetke sáikes, Qazaqstan quramasy kúzde Ulttar ligasy aiasynda bes kezdesý ótkizip, úsheýinde jeńilgen. Al Farer araldarymen ótken eki oiyn teń aiaqtalǵan. Komandany Slovakiiaǵa qarsy sońǵy úi kezdesýi kútip tur.

QFF-daǵy qarjylai daýlar

Ulttyq quramanyń sátsizdigimen qatar, federatsiiaǵa qarasty qurylymdardaǵy qarjy máseleleri de qoǵam nazaryn aýdarǵan.

Kozachkov Qazaqstan fýtzal qaýymdastyǵynda qalyptasqan jaǵdaiǵa erekshe toqtaldy. Onyń málimetinshe, uiymnyń qyzmetkerler men merdigerler aldyndaǵy bereshegi sot daýlaryna ulasqan.

"Federatsiiany janjaldar jan-jaqtan qysyp jatyr. Fýtzal qaýymdastyǵynda aiaq astynan qarjylyq tapshylyq paida boldy. Beine bir keńseden barlyq aqshasy bar chemodandy laqtyryp jibergendei. Sońy sot protsesterine, qaryzdarǵa jáne qyzmetkerlerdiń shaǵymdaryna ulasty", – dep jazdy jýrnalist.

Buǵan deiin qaýymdastyq qyzmetkerleri men merdiger uiymdar tólenbegen qarajatty óndirip alý máselesin kótergen. Jariialanǵan aqparatqa sáikes, uiymǵa qatysty toǵyz atqarýshylyq is qozǵalǵan.

Burynǵy aýditor 50 million teńgege jýyq ótemaqy óndirip aldy

Federatsiianyń ózine qatysty da sot daýy týyndaǵan.

QFF-nyń burynǵy bas aýditory Qambar Omarov jumystan bosatylǵannan keiin sotqa júginip, eńbek kelisimsharty merziminen buryn toqtatylǵany úshin ótemaqy talap etken.

Buǵan deiin jariialanǵan málimet boiynsha, Omarov 2025 jyldyń qańtarynda jumysqa qabyldanǵan. Onyń ai saiynǵy eńbekaqysy shamamen 2,5 million teńgeni quraǵan.

2026 jyldyń mamyrynda shtat qysqarýyna bailanysty qyzmetinen bosatylǵan aýditor eńbek kelisimshartyndaǵy talaptarǵa súienip, qalǵan merzimge tiesili jalaqysyn óndirip alýǵa áreket jasaǵan.

Nátijesinde sot onyń talabyn ishinara qanaǵattandyryp, federatsiiany 50 million teńgege jýyq ótemaqy tóleýge mindettegen.

"Federatsiianyń ózimen de sottasyp jatyr. Burynǵy bas aýditor Qambar Omarov jumystan bosatylǵany úshin kelisimshart merzimi aiaqtalǵanǵa deiingi barlyq jalaqysyn ótemaqy retinde óndirip aldy. Bul shamamen 50 million teńge. Sonyń arqasynda federatsiiada óte qomaqty jalaqy tólenetinin bildik", – dep atap ótti Kozachkov.

Aiyna 5 million teńge jalaqy jáne qosymsha shyǵyndar

Federatsiia qyzmetkerleriniń eńbekaqysyna qatysty buǵan deiin de aqparat taraǵan.

Atap aitqanda, sport jýrnalisi Erbol Qaiyrov QFF-nyń ulttyq quramalar departamentiniń direktory Rýslan Baltievtiń tabysy týraly málimet jariialaǵan.

Onyń aitýynsha, Baltiev ai saiyn 5 million teńge jalaqy alǵan. Budan bólek, qyzmettik kólikke 500 myń teńge jáne qonaqúide turýyna taǵy 500 myń teńge qarastyrylǵan.

Osylaisha, jýrnalist keltirgen derekke súiensek, bir basshyny qamtamasyz etýge ai saiyn 6 million teńgege deiin qarajat jumsalǵan.

Degenmen bul málimetter federatsiianyń resmi qarjylyq esebimen rastalmaǵan.

Buǵan qosa, buǵan deiin áleýmettik jelilerde QFF bas hatshysy Skott Mann jylyna 1 million dollar, al ulttyq quramanyń bas bapkeri Djon van ’t Ship aiyna 75-84 myń dollar alady degen aqparat taraǵan.

Qazaqstan fýtbol federatsiiasy bul málimetterdi joqqa shyǵarǵan. Uiym ókilderi ulttyq quramanyń bas bapkerine tólenetin jalaqy buryn osy qyzmetti atqarǵan Talǵat Baisýfinovtyń eńbekaqysynan aspaitynyn málimdegen.

Alaida federatsiia atalǵan mamandardyń naqty tabysyn ashyq jariialamady.