جالاقى ميلليونداپ تٶلەنەدٸ, نەتيجە كٶڭٸل كٶنشٸتپەيدٸ: قفف باسشىلىعى سىنعا قالدى

جالاقى ميلليونداپ تٶلەنەدٸ, نەتيجە كٶڭٸل كٶنشٸتپەيدٸ: قفف باسشىلىعى سىنعا قالدى
فوتو: جي

قازاقستان فۋتبول فەدەراتسيياسىنداعى قارجىلاي مەسەلەلەر مەن ۇلتتىق قۇرامانىڭ سەتسٸز ويىندارى قوعامدا قىزۋ تالقىلانىپ جاتىر. جۋرناليست ميحايل كوزاچكوۆ فەدەراتسييا باسشىلىعىنداعى ٶزگەرٸستەرگە, شەتەلدٸك مامانداردىڭ قىزمەتٸنە جەنە ۇيىم تٶڭٸرەگٸندەگٸ قارجىلاي داۋلارعا نازار اۋداردى. ونىڭ سٶزٸنشە, فۋتبولدى دامىتۋعا جاۋاپتى قۇرىلىمداعى قوماقتى جالاقى مەن ٶتەماقىلار ۇلتتىق قۇرامانىڭ نەتيجەسٸنە ساي كەلمەيدٸ, دەپ حابارلايدى dalanews.kz.

بۇعان مولدوۆا قۇراماسىنان 2:1 ەسەبٸمەن جەڭٸلۋٸ سەبەپ بولعان. جۋرناليست قازاقستان فۋتبولىنداعى ماۋسىم قورىتىندىسىن سارالاپ, فەدەراتسييا باسشىلىعىنىڭ جۇمىسىنا قاتىستى بٸرقاتار مەسەلەنٸ كٶتەردٸ.

"قازاقستان فۋتبول قۇراماسى ۇلتتار ليگاسىنداعى ۇياتتى ٶنەرٸن جالعاستىرىپ جاتىر. كەشە بٸزدٸڭ ٷزدٸك فۋتبولشىلار كيشينەۆتٸڭ كٶرٸكتٸ جەرلەرٸن ارالاپ, مولدوۆا قۇراماسىنان 2:1 ەسەبٸمەن جەڭٸلٸپ قايتتى", – دەپ جازدى ميحايل كوزاچكوۆ.

باسشىلىق اۋىستى, بٸراق نەتيجە كٶڭٸل كٶنشٸتپەيدٸ

جۋرناليستٸڭ جازۋىنشا, بيىل كٶكتەمدە قازاقستان فۋتبول فەدەراتسيياسىنىڭ باسشىلىق قۇرامىندا ەلەۋلٸ ٶزگەرٸستەر بولعان. اتاپ ايتقاندا, ۇيىمنىڭ باس حاتشىسى قىزمەتٸنە ۇلىبريتانييا ازاماتى سكوتت مانن تاعايىندالعان.

ال جازدا ۇلتتىق قۇرامانىڭ باس باپكەرٸ تالعات بايسۋفينوۆ قىزمەتٸنەن كەتتٸ. ول مۇنداي شەشٸم قابىلداۋىنا كەسٸبي مٸندەتتەرٸن تولىققاندى اتقارۋعا قاجەتتٸ جاعدايدىڭ جاسالماۋى سەبەپ بولعانىن مەلٸمدەگەن.

"العا قويىلعان مٸندەتتەردٸ ورىنداۋ ٷشٸن قاجەتتٸ كەسٸبي جاعدايلار جوق", – دەگەن ەدٸ بايسۋفينوۆ.

ونىڭ ورنىنا نيدەرلاندىلىق مامان دجون ۆان ’ت سحيپ كەلدٸ. كوزاچكوۆ بۇل تاعايىنداۋدى فەدەراتسييانىڭ جاڭا باس حاتشىسى سكوتت ماننمەن بايلانىستىرادى.

الايدا باپكەرلەر قۇرامىنداعى ٶزگەرٸستەر ەزٸرگە ۇلتتىق كوماندانىڭ نەتيجەسٸنە وڭ ەسەر ەتپەگەن.

جۋرناليست كەلتٸرگەن مەلٸمەتكە سەيكەس, قازاقستان قۇراماسى كٷزدە ۇلتتار ليگاسى اياسىندا بەس كەزدەسۋ ٶتكٸزٸپ, ٷشەۋٸندە جەڭٸلگەن. ال فارەر ارالدارىمەن ٶتكەن ەكٸ ويىن تەڭ اياقتالعان. كوماندانى سلوۆاكيياعا قارسى سوڭعى ٷي كەزدەسۋٸ كٷتٸپ تۇر.

قفف-داعى قارجىلاي داۋلار

ۇلتتىق قۇرامانىڭ سەتسٸزدٸگٸمەن قاتار, فەدەراتسيياعا قاراستى قۇرىلىمدارداعى قارجى مەسەلەلەرٸ دە قوعام نازارىن اۋدارعان.

كوزاچكوۆ قازاقستان فۋتزال قاۋىمداستىعىندا قالىپتاسقان جاعدايعا ەرەكشە توقتالدى. ونىڭ مەلٸمەتٸنشە, ۇيىمنىڭ قىزمەتكەرلەر مەن مەردٸگەرلەر الدىنداعى بەرەشەگٸ سوت داۋلارىنا ۇلاسقان.

"فەدەراتسييانى جانجالدار جان-جاقتان قىسىپ جاتىر. فۋتزال قاۋىمداستىعىندا اياق استىنان قارجىلىق تاپشىلىق پايدا بولدى. بەينە بٸر كەڭسەدەن بارلىق اقشاسى بار چەموداندى لاقتىرىپ جٸبەرگەندەي. سوڭى سوت پروتسەستەرٸنە, قارىزدارعا جەنە قىزمەتكەرلەردٸڭ شاعىمدارىنا ۇلاستى", – دەپ جازدى جۋرناليست.

بۇعان دەيٸن قاۋىمداستىق قىزمەتكەرلەرٸ مەن مەردٸگەر ۇيىمدار تٶلەنبەگەن قاراجاتتى ٶندٸرٸپ الۋ مەسەلەسٸن كٶتەرگەن. جارييالانعان اقپاراتقا سەيكەس, ۇيىمعا قاتىستى توعىز اتقارۋشىلىق ٸس قوزعالعان.

بۇرىنعى اۋديتور 50 ميلليون تەڭگەگە جۋىق ٶتەماقى ٶندٸرٸپ الدى

فەدەراتسييانىڭ ٶزٸنە قاتىستى دا سوت داۋى تۋىنداعان.

قفف-نىڭ بۇرىنعى باس اۋديتورى قامبار وماروۆ جۇمىستان بوساتىلعاننان كەيٸن سوتقا جٷگٸنٸپ, ەڭبەك كەلٸسٸمشارتى مەرزٸمٸنەن بۇرىن توقتاتىلعانى ٷشٸن ٶتەماقى تالاپ ەتكەن.

بۇعان دەيٸن جارييالانعان مەلٸمەت بويىنشا, وماروۆ 2025 جىلدىڭ قاڭتارىندا جۇمىسقا قابىلدانعان. ونىڭ اي سايىنعى ەڭبەكاقىسى شامامەن 2,5 ميلليون تەڭگەنٸ قۇراعان.

2026 جىلدىڭ مامىرىندا شتات قىسقارۋىنا بايلانىستى قىزمەتٸنەن بوساتىلعان اۋديتور ەڭبەك كەلٸسٸمشارتىنداعى تالاپتارعا سٷيەنٸپ, قالعان مەرزٸمگە تيەسٸلٸ جالاقىسىن ٶندٸرٸپ الۋعا ەرەكەت جاساعان.

نەتيجەسٸندە سوت ونىڭ تالابىن ٸشٸنارا قاناعاتتاندىرىپ, فەدەراتسييانى 50 ميلليون تەڭگەگە جۋىق ٶتەماقى تٶلەۋگە مٸندەتتەگەن.

"فەدەراتسييانىڭ ٶزٸمەن دە سوتتاسىپ جاتىر. بۇرىنعى باس اۋديتور قامبار وماروۆ جۇمىستان بوساتىلعانى ٷشٸن كەلٸسٸمشارت مەرزٸمٸ اياقتالعانعا دەيٸنگٸ بارلىق جالاقىسىن ٶتەماقى رەتٸندە ٶندٸرٸپ الدى. بۇل شامامەن 50 ميلليون تەڭگە. سونىڭ ارقاسىندا فەدەراتسييادا ٶتە قوماقتى جالاقى تٶلەنەتٸنٸن بٸلدٸك", – دەپ اتاپ ٶتتٸ كوزاچكوۆ.

ايىنا 5 ميلليون تەڭگە جالاقى جەنە قوسىمشا شىعىندار

فەدەراتسييا قىزمەتكەرلەرٸنٸڭ ەڭبەكاقىسىنا قاتىستى بۇعان دەيٸن دە اقپارات تاراعان.

اتاپ ايتقاندا, سپورت جۋرناليسٸ ەربول قايىروۆ قفف-نىڭ ۇلتتىق قۇرامالار دەپارتامەنتٸنٸڭ ديرەكتورى رۋسلان بالتيەۆتٸڭ تابىسى تۋرالى مەلٸمەت جارييالاعان.

ونىڭ ايتۋىنشا, بالتيەۆ اي سايىن 5 ميلليون تەڭگە جالاقى العان. بۇدان بٶلەك, قىزمەتتٸك كٶلٸككە 500 مىڭ تەڭگە جەنە قوناقٷيدە تۇرۋىنا تاعى 500 مىڭ تەڭگە قاراستىرىلعان.

وسىلايشا, جۋرناليست كەلتٸرگەن دەرەككە سٷيەنسەك, بٸر باسشىنى قامتاماسىز ەتۋگە اي سايىن 6 ميلليون تەڭگەگە دەيٸن قاراجات جۇمسالعان.

دەگەنمەن بۇل مەلٸمەتتەر فەدەراتسييانىڭ رەسمي قارجىلىق ەسەبٸمەن راستالماعان.

بۇعان قوسا, بۇعان دەيٸن ەلەۋمەتتٸك جەلٸلەردە قفف باس حاتشىسى سكوتت مانن جىلىنا 1 ميلليون دوللار, ال ۇلتتىق قۇرامانىڭ باس باپكەرٸ دجون ۆان ’ت سحيپ ايىنا 75-84 مىڭ دوللار الادى دەگەن اقپارات تاراعان.

قازاقستان فۋتبول فەدەراتسيياسى بۇل مەلٸمەتتەردٸ جوققا شىعارعان. ۇيىم ٶكٸلدەرٸ ۇلتتىق قۇرامانىڭ باس باپكەرٸنە تٶلەنەتٸن جالاقى بۇرىن وسى قىزمەتتٸ اتقارعان تالعات بايسۋفينوۆتىڭ ەڭبەكاقىسىنان اسپايتىنىن مەلٸمدەگەن.

الايدا فەدەراتسييا اتالعان مامانداردىڭ ناقتى تابىسىن اشىق جارييالامادى.