2023 jylǵy 1 naýryzdan bastap Qazaqstan Respýblıkasynda jeke tulǵalardyń bankrottyq ınstıtýty iske qosyldy. Osy kezeńnen bastap búginge deıin bankrottyq rásimin qoldanýǵa 270 myńnan astam ótinish kelip túsken, dep habarlaıdy Dalanews.kz.
"Onyń ishinde 262 myń ótinish sottan tys bankrottyq rásimi aıasynda berilgen. Alaıda, 193 myń ótinish (73%) boıynsha kiris ólshemsharttaryna sáıkes kelmeý faktileri anyqtalyp, nátıjesinde ótinishter qanaǵattandyrylmaǵan. Negizgi sebepter — ótinish berýshiniń menshiginde múliktiń bolýy, bereshek somasy men tólem jasalmaǵan merzimniń talaptarǵa sáıkes kelmeýi, sondaı-aq kredıtormen bereshekti retteý rásiminiń bolmaýy", dep túsindiredi Memlekettik kirister departamenti.
Quzyrly vedmstvo qoljetimdilikti arttyrýǵa baǵyttalǵan zańnamalyq ózgerister engizilgenin aıtady. Máselen, sottan tys bankrottyq rásimin jeńildetý maqsatynda 2024 jylǵy 19 maýsymda jáne 2025 jylǵy 30 maýsymda zańnamaǵa ózgerister engizildi.
Birinshi kezeńdegi ózgerister:
- bereshekti retteý týraly qujattardy qosa berý talaby alynyp tastaldy;
- kredıtor men bereshek somasy týraly málimetterdi kórsetý talaby joıyldy — bul aqparat endi tikeleı kredıttik búrolardan suratylady;
- sottan tys bankrottyq rásimine qatysatyn kredıtorlardyń tizbesi keńeıtildi.
2025 jylǵy 1 shildedegi iske asyrý nátıjeleri
Buǵan deıin bas tartylǵan azamattardyń arasynan 6 795 adam sebepterin joıǵannan keıin 3 aı ótken soń ótinishti qaıta tapsyryp, bankrot dep tanyldy.
Búgingi tańda 34 600 azamat resmı túrde bankrot dep tanyldy, onyń ishinde:
- 2 031 adam – ataýly áleýmettik kómek alýshylar,
- 10 451 adam – 5 jyldan astam merzimde qaryzdaryn ótemegender.
Sot tártibimen bankrottyq jáne tólem qabilettiligin qalpyna keltirý aıasynda:
- kelip túsken 10 000 ótinishtiń ishinen 225 azamat bankrot dep tanyldy;
- 181 azamat tólem qabilettiligin qalpyna keltirý rásiminen ótýde.
"Zań aıasynda óz múmkindigin paıdalanǵan 34 myńnan astam azamat shamadan tys bereshek júktemesinen arylyp, ekonomıkalyq belsendi ómirge qaıta oraldy", delingen habarlamada.
Olardyń ishinde:
- 1 248 azamat jeke kásipker retinde tirkeldi,
- 2024 jylǵa arnalǵan salyq eseptiligine sáıkes, olardyń jıyntyq tabysy 202,8 mln teńgeni, eseptelgen salyq somasy – 16 mln teńgeni qurady.
Bul derekter jeke kásipker retinde tirkelgen azamattardy ǵana qamtıdy.
