Qazaqstanda et qymbattaǵan, biraq qazaqstandyqtar burynǵydan da kóp et jeitin bolǵan. Bul týraly EnergyProm sarapshylary málimdedi, dep habarlaidy Dalanews.kz.
Agenttik málimetinshe, 2025 jyldyń alǵashqy toqsanynda elimizde jan basyna shaqqanda et pen et ónimderin tutyný kólemi orta eseppen 20,6 keli bolǵan. Bul byltyrmen salystyrǵanda 1,7 paiyzǵa artyq.
Etti eń kóp tutynǵan óńirler – Aqmola oblysy (bir adamǵa 24,1 keli), Jambyl oblysy (23,9 keli) jáne Mańǵystaý oblysy (23,6 keli).
Al eń tómengi kórsetkishter Qyzylorda oblysynda (15,8 keli), Shymkentte (16,3 keli) jáne Túrkistan oblysynda (16,9 keli) tirkelgen.
2025 jyldyń birinshi toqsanynda bir otbasynyń et pen et ónimderine jumsaǵan ortasha shyǵyny 157,9 myń teńge bolǵan. Bul byltyrmen salystyrǵanda 9,5 paiyzǵa joǵary.
Etke eń kóp qarjy jumsaǵan óńir – Mańǵystaý oblysy. Mundaǵy otbasylar orta eseppen 233,5 myń teńge jumsaǵan. Bul – el boiynsha ortasha deńgeiden 47,9 paiyzǵa artyq. Alaida ótken jylmen salystyrǵanda (238,2 myń teńge) 2 paiyzǵa tómen.
Shyǵyn kólemi boiynsha kelesi orynda – Jambyl oblysy (222 myń teńge) jáne Atyraý oblysy (219,3 myń teńge).
Etke eń az qarjy jumsaǵan – Soltústik Qazaqstan oblysynyń turǵyndary: ortasha eseppen 92,7 myń teńge. Odan keiin Qostanai oblysy (101,3 myń teńge) jáne Aqmola oblysy (121,7 myń teńge) tur.
Ulttyq statistika biýrosynyń málimetine sáikes, maýsym aiynda et pen et ónimderi bir aida 1,2 paiyzǵa, al bir jyl ishinde 11,3 paiyzǵa qymbattaǵan.
