«Qazaqmys» kompaniialar toby Jezqazǵan óndiristik alańyn aýqymdy jańǵyrtý baǵdarlamasyn júzege asyryp jatyr, dep habarlaidy dalanews.kz.
Kompaniia iesi Nurlan Artyqbaev Qazaqstannyń Ónerkásip jáne qurylys ministri Ersaiyn Naǵaspaevpen birge Jezqazǵandaǵy negizgi óndiristik nysandardy aralap, júzege asyrylyp jatqan investitsiialyq jobalardyń barysymen tanysty.
Jumys sapary barysynda óndiris tiimdiligin arttyrý, ónerkásiptik qaýipsizdikti kúsheitý, ekologiialyq jańǵyrtý jáne kásiporyndardyń óndiristik qýatyn keńeitý máseleleri talqylandy.
Delegatsiia aldymen Jezqazǵan mys balqytý zaýytynda boldy. Munda óndiristik qýattardyń senimdiligin arttyrý maqsatynda júrgizilip jatqan kúrdeli jóndeý jáne jabdyqtardy jańǵyrtý jobalary tanystyryldy.
Kompaniia sońǵy jyldary óndiristi ekologiialyq turǵydan jańǵyrtýǵa erekshe nazar aýdaryp otyr. Osy baǵytta Jezqazǵan mys balqytý zaýyty, «Qazkat» zaýyty jáne Jezqazǵan baiytý fabrikalarynyń súzgileý-keptirý bólimshelerinde júzege asyrylǵan gazdandyrý jobasy tolyq aiaqtalǵan.
Quny shamamen 4 mln AQSh dollaryn quraityn joba aiasynda 20 óndiristik nysan iske qosylyp, negizgi tehnologiialyq jabdyqtar mazýttan tabiǵi gazǵa kóshirildi.
Nátijesinde Jezqazǵan mys balqytý zaýytyndaǵy parniktik gazdar shyǵaryndylary 11,79 paiyzǵa tómendegen. Al súzgileý-keptirý bólimshelerindegi kórsetkish shamamen 80 paiyzǵa qysqarǵan. Kompaniia dereginshe, jobanyń jyl saiynǵy ekonomikalyq tiimdiligi shamamen 4 mlrd teńgeni quraidy.
Sapar barysynda metallýrgiialyq keshendi odan ári damytýǵa arnalǵan jańa jobalar da tanystyryldy. Solardyń biri – quny 200 mln AQSh dollaryn quraityn jańa kúkirt qyshqyly tsehynyń qurylysy.
Joba iske asqan jaǵdaida kúkirt dioksidi shyǵaryndylary eki eseden astam qysqaryp, óndiris zamanaýi ekologiialyq talaptarǵa sáikestendirilmek.
Sonymen qatar qýaty 35 megavatt bolatyn gaz-porshendi elektr stantsiiasyn salý jospary da jariialandy. Jobanyń investitsiialyq quny 24,8 mln eýrony quraidy.
Kompaniianyń baǵalaýynsha, bul stantsiia kásiporynnyń energetikalyq táýelsizdigin arttyryp, jyl saiyn shamamen 5,5 mlrd teńge únemdeýge múmkindik beredi.
Delegatsiia sondai-aq №1, №2 jáne №3 Jezqazǵan baiytý fabrikalarynda bolyp, tehnologiialyq jabdyqtardy jańartý, shikizatty óńdeý tiimdiligin arttyrý jáne óndiristik infraqurylymdy damytý jumystarynyń barysymen tanysty.
Sapar qorytyndysynda Nurlan Artyqbaev Jezqazǵan óndiristik alańyn jańǵyrtý «Qazaqmys» kompaniiasynyń negizgi strategiialyq baǵyttarynyń biri bolyp qala beretinin aitty.
Onyń sózinshe, aldaǵy ýaqytta óndiristi tehnologiialyq turǵydan jańartý, ekologiialyq jobalardy júzege asyrý, qaýipsizdik deńgeiin arttyrý jáne jańa óndiristik sheshimderge investitsiia tartý jumystary jalǵasady.
