Májilis depýtaty Magerram Magerramov shetelden qarjylandyrylatyn qazaqstandyq quqyq qorǵaý uiymdarynyń qyzmetine qatysty ótkir málimdeme jasap, olardyń keibiriniń áreketinde ekstremizm belgileri bar ekenin aitty, dep habarlaidy dalanews.kz.
Depýtattyń sózinshe, birqatar úkimettik emes uiymdar quqyq qorǵaý qyzmeti degen urannyń astynda memleket institýttaryna degen senimdi álsiretip keledi.
«Shyn máninde, bul uiymdardyń kóbi ondaǵan jyl boiy óz eline degen jekkórýshiliktiń jarshysy retinde jumys istep keledi. Quqyq qorǵaý ritorikasynyń tasasynda azamattardyń memlekettik institýttarǵa degen senimin júieli túrde buzyp, turaqsyzdyqqa qolaily orta qalyptastyrýmen ainalysady. Mundai áreketter uzaq jyldar boiy tiisti quqyqtyq baǵa almai keldi. Al is júzinde olardyń qyzmetinde ekstremistik áreket belgileri baiqalady», – dedi Mágerramov.
Alaida depýtat óz málimdemesin naqty zertteýlermen, saraptamalarmen nemese resmi eseptermen dáleldegen joq.
Sonymen qatar májilismen shetelden qarjy alatyn úkimettik emes uiymdar, qoǵamdyq qorlar, buqaralyq aqparat quraldary jáne quqyq qorǵaý uiymdary týraly memlekettik tizilimdi «inoagentter tizimi» dep atady.
Onyń aitýynsha, bul ataý halyq arasynda keń taralǵan.
Buǵan deiin Mádeniet jáne aqparat ministri Aida Balaeva Qazaqstandaǵy atalǵan tizilimdi Reseidegi «shetel agentteri týraly» zańmen salystyrý durys emes ekenin málimdegen bolatyn.
«Munda eshqandai uqsastyq izdeýdiń qajeti joq. Óitkeni bul – shetel agentteri týraly zań emes. Áńgime tek salyqtyq eseptilik pen qarjylyq ashyqtyq týraly bolyp otyr», – degen edi ministr.
Soǵan qaramastan Mágerramov qazirgi jariialanyp júrgen aqparat jetkiliksiz dep esepteidi. Onyń pikirinshe, sheteldik qarjy alatyn uiymdar týraly málimetter kólemin keńeitý qajet.
«Jariialanatyn aqparattyń quramyna naqty jobalar men baǵdarlamalardyń ataýy, olardyń maqsaty men taqyryby, qarajatty bólý tizbegindegi merdigerler men qosalqy merdigerler týraly derekter, túpkilikti ónimdi ázirleitin jeke tulǵalar jónindegi málimetter engizilýi kerek. Sondai-aq qandai zertteýler, media-naýqandar jáne qoǵamdyq aktsiialar qarjylandyrylǵany týraly aqparat ta ashyq kórsetilýi tiis», – dedi depýtat.
Sonymen birge ol sóziniń ÚEU qyzmetine tyiym salý týraly emes ekenin atap ótti.
Aita keteiik, buǵan deiin «Erkindik qanaty» qoǵamdyq qorynyń teń quryltaishysy, quqyq qorǵaýshy Roman Reimer Qazaqstandaǵy úkimettik emes uiymdardyń qyzmeti qazirdiń ózinde jetkilikti deńgeide ashyq ekenin aitqan bolatyn. Onyń sózinshe, ÚEU-lar granttar men kelisimsharttar týraly aqparatty, qarjylandyrý kózderin jáne alynǵan qarajat kólemin jariialap keledi.
