Qazaqstan memlekettik basqarýdaǵy minez-qulyq tásilderin qoldanatyn uiymdardyń jahandyq kartasynda alǵash ret resmi túrde usynyldy, dep habarlaidy dalanews.kz.
2026 jyldyń maýsymynda Nazarbaev Ýniversiteti janyndaǵy Ulttyq analitikalyq ortalyqtyń Memlekettik basqarý jáne minez-qulyq saiasaty ortalyǵy Ekonomikalyq yntymaqtastyq jáne damý uiymynyń (OESR) Memlekettik sektordaǵy innovatsiialar observatoriiasynyń halyqaralyq bazasyna engizildi.
Bul bazaǵa memlekettik saiasat pen memlekettik qyzmetterdiń tiimdiligin arttyrý úshin minez-qulyq tásilderin qoldanatyn 63 eldegi 300-ge jýyq uiym engen. Qazaqstan osy ýaqytqa deiin atalǵan jahandyq kartada usynylmaǵan bolatyn.
Ortalyqtyń halyqaralyq bazaǵa qosylýy Qazaqstannyń memlekettik basqarýdy jańǵyrtý, ǵylymi negizdelgen sheshimderdi engizý jáne memlekettik saiasattyń tiimdiligin arttyrý baǵytyndaǵy jumysynyń nátijesi retinde baǵalanyp otyr.
Memlekettik basqarý jáne minez-qulyq saiasaty ortalyǵy – Qazaqstandaǵy osy baǵytta jumys isteitin alǵashqy mamandandyrylǵan qurylym. Ortalyq memlekettik organdar úshin zertteýler júrgizip, minez-qulyq quraldaryn ázirleidi, olardy synaqtan ótkizip, ǵylymi-ádistemelik qoldaý kórsetedi.
Bul jumys Qazaqstannyń memlekettik basqarýdy derekterge, ǵylymi zertteýlerge jáne sheshimderdi aldyn ala testileýge negizdelgen jańa modelge kóshirý strategiiasynyń bir bóligi sanalady.
Kásibi quzyretterdi damytý maqsatynda Ulttyq analitikalyq ortalyq minez-qulyq ǵylymy salasyndaǵy álemdik kóshbasshylardyń biri sanalatyn britandyq Behavioural Insights Team (BIT) uiymymen yntymaqtastyq ornatqan.
Sońǵy on jylda kóptegen memleketter memlekettik basqarýda minez-qulyq ǵylymynyń múmkindikterin belsendi paidalana bastady. Mundai tásilder densaýlyq saqtaý, salyq júiesi, áleýmettik saiasat jáne kólik salalarynda keńinen qoldanylady.
Minez-qulyq quraldarynyń basty ereksheligi – azamattardyń tańdaý erkindigin shektemei, olardyń sheshim qabyldaý ortasyn jetildirý arqyly qajetti nátijege qol jetkizý.
Qazaqstanda bul tásilder tájiribe júzinde de qoldanylyp úlgerdi. Ulttyq analitikalyq ortalyq BIT sarapshylarymen jáne Magnum Cash & Carry saýda jelisimen birlesip «ekonomikalyq patriotizmdi» yntalandyrýǵa baǵyttalǵan pilottyq joba júzege asyrdy.
2026 jyldyń naýryz-sáýir ailarynda Astanadaǵy segiz sýpermarkette qazaqstandyq irimshikterdi satyp alýdy yntalandyratyn vizýaldy jáne dybystyq quraldar synaqtan ótkizildi. Dúkenderde «Qazaqstanda jasalǵan» degen belgiler, bannerler, sóre bólgishteri men aýdiohabarlamalar qoldanylǵan.
Joba nátijesinde baǵalardy ózgertpei jáne ákimshilik sharalar engizbei-aq qazaqstandyq irimshikterdiń satylymy 20 paiyzǵa artqany tirkeldi.
Keiin bul tájiribe keńeitilip, Saýda jáne integratsiia ministrligi, «QazTrade» AQ jáne óńirlik saýda basqarmalarynyń qatysýymen respýblika kóleminde engizile bastady.
OESR-diń Memlekettik sektordaǵy innovatsiialar observatoriiasy memlekettik basqarýdaǵy ozyq tájiribeler men innovatsiialyq sheshimderdi jinaqtaityn halyqaralyq alań bolyp sanalady.
Qazaqstandyq ortalyqtyń jahandyq kartaǵa engizilýi eldiń memlekettik basqarýdaǵy zamanaýi tásilderdi engizý baǵytyndaǵy pozitsiiasyn kúsheitip, halyqaralyq tájiribe almasýǵa jańa múmkindikter ashady.
