Prezidenttiń strategiialyq tapsyrmalaryn oryndaý maqsatynda «Qazatomónerkásip» ulttyq atom kompaniiasynyń demeýshiligimen Túrkistan qalasynda «Woosong University Kazakhstan» halyqaralyq qazaq-korei IT-ýniversitetiniń jańa oqý korpýsynyń qurylysy bastaldy, dep habarlaidy dalanews.kz.
Elimizde bilim berý men jańa tehnologiialar salasyn damytý, sondai-aq zamanaýi IT-mamandardy daiarlaý baǵytynda aýqymdy bastamalar júzege asyrylyp jatyr. Memleket basshysy Qasym-Jomart Toqaev eldi tsifrlandyrý, jasandy intellekt múmkindikterin keńinen paidalaný jáne osy sala boiynsha halyqaralyq deńgeidegi kadrlar daiarlaý máselesine erekshe mán beretinin atap ótti.
Qazirgi tańda memleket tarapynan qoiylǵan mindetterdi oryndaý jolynda el óńirlerinde áleýmettik mańyzy bar bastamalar júieli túrde júzege asyrylyp keledi. Osy baǵyttaǵy jumystarǵa Qazatomónerkásip kompaniiasy da belsendi atsalysyp, óndiristik aimaqtar men jańa ortalyqtardyń áleýmettik-ekonomikalyq áleýetin arttyrýǵa súbeli úles qosyp júr. Atap aitqanda, ulttyq kompaniia óńirlerdegi bilim berý, densaýlyq saqtaý jáne turǵyn úi infrastrýktýrasyn damytýǵa baǵyttalǵan jalpy qarjylandyrý kólemi 14 milliard teńgeden asatyn aýqymdy jobalardy qoldap keledi. Bul bastamalardyń ishinde Túrkistan oblysyndaǵy jobalardyń úlesi aitarlyqtai joǵary - aimaqtaǵy áleýmettik maqsattarǵa baǵyttalǵan qarjy kólemi 10 milliard teńgeden asady.
Osy aýqymdy jumystardyń ózegi retinde Túrkistan qalasynda «Woosong University Kazakhstan» halyqaralyq IT-ýniversitetiniń jańa oqý korpýsyn salýǵa tikelei demeýshilik kórsetilip, bul maqsatqa 7,5 milliard teńge kóleminde qarajat bólinip otyr. Jańa oqý kesheniniń jobasyna sáikes, bolashaq bilim ordasynyń ǵimarattary 4 qabatty bolyp salynady jáne jalpy aýdany 16,5 myń sharshy metrdi quraidy. Keshen quramynda A, B jáne V bloktarynan turatyn 3 zamanaýi ǵimarat boi kóteredi dep josparlanǵan. Qurylys jumystary bastalyp ketti jáne barlyq injenerlik-tehnikalyq talaptarǵa sai salynǵan jańa nysan 2027 jylǵy jańa oqý jylynda stýdentterdi qabyldaidy dep kútilýde.
Investitsiialyq jobalar tek iri nysandarmen shektelmeidi. Qazatomónerkásip kompaniiasynyń enshiles jáne táýeldi uiymdary óńirdegi áleýmettik jáne injenerlik infrastrýktýrany jaqsartýǵa, oqý oryndaryn jóndeýge, mektepterge qoldaý kórsetýge jáne eldi mekenderdi abattandyrýǵa baǵyttalǵan kishigirim bastamalar men áleýmettik jobalarǵa qosymsha 470 million teńgeden astam qarajat baǵyttaǵan. Bul - turǵyndardyń ómir súrý sapasyn arttyryp qana qoimai, óńirdiń de damýyna úles qosady.
Zamanaýi bilim berý ordasynda stýdentterdiń jan-jaqty damýy men sapaly bilim alýy úshin barlyq jaǵdai qarastyrylǵan. Oqý ornyndaǵy ishki ahýal men stýdenttik ómirdiń qyr-syry týraly AI & Data Science kafedrasynyń 2-kýrs stýdenti, Student Body prezidenti Aziza Ramazan óz tájiribesimen bólisti:
«Eń basynda, árine, bárimiz jańa ortaǵa dym bilmei, artyq eshteńe kútpei kelgen edik. Alaida bilikti mamandar men professorlardyń arqasynda zeiinimiz ashylyp, kóptegen múmkindikterge jol ashtyq. Mysaly, aldyńǵy jyly qurbym Mustafa Qaraqat ekeýmiz «Söyle AI» startap jobasyn bastadyq. Osy joba arqyly túrli hakatondar men jarystarǵa qatysyp, mol tájiribe jinaqtadyq. Sondai-aq shetelderge baryp, ózge elderdiń mádenietimen tanysýǵa, halyqaralyq IT saiystarǵa qatysýǵa múmkindik aldyq. Ýniversitet kampýsynda stýdentter úshin barlyq jaǵdai jasalǵan: birinshi qabatta kantin - ashanamyz ornalasqan, sabaqqa nemese emtihandarǵa daiyndalý úshin búkil úshinshi qabat, kitaphana berilgen. Ǵimarat qajetti kompiýterlermen tolyq jabdyqtalǵan, soǵan bailanysty emtihandardy da, praktikalyq tapsyrmalardy da oqý orny usynǵan kompiýterlerde oryndaimyz. Ár qabatta demalatyn, dostarmen sóilesetin aimaqtar qarastyrylǵan. Jańa korpýstardyń ashylýymen jastarymyzǵa sapaly bilim alý úshin odan da keń múmkindikter ashylatynyna senimdimin!»
Rasynda da, Qazatomónerkásip qolǵa alyp jatqan osyndai aýqymdy jáne uzaq merzimdi áleýmettik baǵyttaǵy bastamalar óńirdiń ekonomikalyq áleýetin kóterip qana qoimai, jas býynnyń halyqaralyq standartqa sai básekege qabiletti, kásibi maman bolyp qalyptasýyna jol ashady. Túrkistan qalasynda boi kóterip jatqan jańa oqý korpýsy erteńgi kúni elimizdiń tsifrlyq ekonomikasy men jasandy intellekt salasyna súbeli úles qosatyn bilikti kadrlardyń naǵyz ustahanasyna ainalary sózsiz.
