Túrkistan oblysyna jumys sapary barysynda Qazaqstan Respýblikasynyń Premer-ministri Oljas Bektenov sý qoimalarynyń jai-kúiimen, gidrotehnikalyq qurylystardy qaita jańǵyrtý jumystarynyń barysymen jáne elimizdiń ońtústik óńirlerin turaqty sýmen qamtamasyz etý boiynsha atqarylyp jatqan sharalarmen tanysty,- dep habarlaidy Dalanews.kz
Premer-ministr «Shardara» sý qoimasy men «Kóksarai» sý rettegish nysanyn baryp kórdi.
«Qazgidromet» RMK-nyń málimeti boiynsha, elimizdiń ońtústik óńirlerindegi biylǵy vegetatsiia maýsymynda jaýyn-shashyn tapshy bolyp tur. Dúniejúzilik meteorologiialyq uiym men Soltústik Eýraziialyq klimat ortalyǵynyń boljamdarynda gidrologiialyq qurǵaqshylyqtyń yqtimaldyǵy joǵary. Bul aýyl sharýashylyǵyna qater týdyryp otyr, ásirese Syrdariia ózeni basseini boiynda qurǵaq aýa raiy uzaq ýaqyt saqtalar bolsa, keibir jerlerde egin qýrap ketýi múmkin.
Sý berýdi ońtailandyrý jónindegi ishki sharalarmen qatar, Úkimet Syrdariia ózeniniń joǵary jaǵynda ornalasqan kórshiles memlekettermen Ortalyq Aziianyń memleketaralyq sý sharýashylyǵyn úilestirý komissiiasy aiasynda kelissózder júrgizýde. Qol jetkizilgen kelisimder sýdy ýaqtyly alýǵa múmkindik beredi.
Oljas Bektenov sýdy bólýde ashyqtyqty qamtamasyz etý úshin qadaǵalaýdy kúsheitý qajettigin aitty.
«Agroónerkásip kesheni – ekonomikanyń negizgi sektorlarynyń biri. Qazirgi jaǵdaida sý resýrstaryn qajetine qarai jáne qatań qadaǵalai otyryp bólý erekshe mańyzǵa ie. Qadaǵalaýdy barlyq deńgeide kúsheitip, sý bólýdi ashyq etý qajet», — dep atap ótti Premer-ministr.
Osy turǵyda Premer-ministrdiń orynbasary Qanat Bozymbaevqa kórshiles eldermen sý berý rejimderin kelisý jáne týyndaǵan máselelerge jedel den qoiý, sonyń ishinde turǵyndardy aýyz sýmen qamtamasyz etý boiynsha jumystardy úilestirý tapsyryldy.
«Kóksarai» sý rettegish nysanyn tekserý qorytyndysynda Premer-ministr Sý resýrstary jáne irrigatsiia ministrligine kontrrettegishtiń tolyq qýatynda jumys isteýin qalpyna keltirý maqsatynda rekonstrýktsiialaý jumystaryn jedeldetýdi tapsyrdy. Bul ózen aǵynyn qajetine qarai retteý jáne ońtústik óńirlerdegi sharýalardy turaqty sýmen qamtamasyz etý úshin qajet.
Oljas Bektenov transshekaralyq sý kózderinen keletin sý kóleminiń azaiýyna bailanysty Úkimet ishki sý qoryn damytýǵa basymdyq berip otyrǵanyn atap ótti.
«Memleket basshysy kóktemgi jáne erigen qar sýyn jinap, ony egistikke tiimdi paidalaný úshin 20 jańa bógen salý, keminde 15 sý qoimasyna kúrdeli jóndeý júrgizý jóninde tapsyrma bergen bolatyn. Taiaý ýaqytta “Báidibek ata” jáne “Boraldai” sý qoimalary arqyly “Bógen” sý qoimasyna qosymsha 113 mln tekshe metr sý berilgeniniń arqasynda Túrkistan qalasy kepildi túrde sýmen qamtamasyz etiletin bolady. Transshekaralyq sý kózderinen keletin sý kólemi jyldan-jylǵa azaiyp keledi. Soǵan bailanysty biz ishki sý qorlaryn barynsha paidalaný úshin qosymsha sý qoimalaryn salý joldaryn qarastyrýymyz qajet»,— dep atap ótti Oljas Bektenov.
Premer-ministr Sý resýrstary jáne irrigatsiia ministrligine Túrkistan oblysynyń ákimdigimen birlesip, óńirdegi sý sharýashylyǵy jobalaryn ýaqtyly qarjylandyrýdy jáne júzege asyrýdy tapsyrdy.
