Astanada Qazaqstannyń jańa Konstitýtsiiasynyń arnaiy basylymyn saltanatty túrde tabystaý rásimi ótti. Memleket basshysy Qasym-Jomart Toqaevtyń hatymen birge basylym danalaryn Premer-ministrdiń orynbasary – Mádeniet jáne aqparat ministri Aida Balaeva tabystady, dep habarlaidy dalanews.kz.
Arnaiy basylym shyǵarmashylyq jáne ǵylymi ziialy qaýym ókilderine, sondai-aq Qazaqstan Respýblikasy Prezidentiniń janyndaǵy Áielder isteri jáne otbasylyq-demografiialyq saiasat jónindegi Ulttyq komissiia múshelerine berildi.
Jiynda Aida Balaeva jańa Konstitýtsiianyń qabyldanýy Qasym-Jomart Toqaev 2019 jyly bastaǵan saiasi jáne qoǵamdyq jańǵyrýlardyń zańdy jalǵasy ekenin atap ótti. Úkimet basshysynyń orynbasary Konstitýtsiianyń mańyzy onda bekitilgen quqyqtyq normalarmen ǵana emes, eń aldymen, onyń ózegine ainalǵan qundylyqtarmen aiqyndalatynyna nazar aýdardy.
«Biz úshin asa mańyzdy jańashyldyqtyń biri – mádeniet, ǵylym jáne bilimniń negizgi konstitýtsiialyq qundylyqtar qataryna engizilýi. Ulttyq mádenietti memlekettik qoldaý jáne tarihi-mádeni murany saqtaý alǵash ret memlekettiń asa mańyzdy mindetteriniń biri retinde konstitýtsiialyq deńgeide bekitildi. Sonymen qatar Konstitýtsiiada árbir azamattyń tarihi-mádeni muraǵa uqypty qaraýǵa, tarih jáne mádeniet eskertkishterin qorǵaýǵa mindetti ekeni naqty kórsetilgen. Bul máni tereń, mańyzy zor ózgeris. Óitkeni mádeni murany saqtaý – memlekettiń ǵana emes, búkil qoǵamnyń ortaq mindeti ári jaýapkershiligi», – dedi Aida Balaeva.
Premer-ministrdiń orynbasary jańa Konstitýtsiianyń ideialyq negizinde Memleket basshysy usynǵan «Ádiletti Qazaqstan», «Zań men tártip», «Adal azamat» jáne «Taza Qazaqstan» jalpyulttyq qaǵidattary jatqanyn atap ótti.
Kezdesý barysynda jańa Konstitýtsiiada otbasy institýtynyń quqyqtyq negizderi naqtylanyp, qoǵam úshin airyqsha mańyzy bar qundylyqtardy qorǵaý kepildikteri kúsheitilgeni de aityldy.
Eske sala keteiik, Qazaqstannyń jańa Konstitýtsiiasy 2026 jylǵy 15 naýryzda ótken respýblikalyq referendým qorytyndysy boiynsha qabyldandy. Qujat 2026 jylǵy 1 shildeden bastap kúshine enedi.
