Almatydaǵy UQK tergeý izoliatorynda otyrǵan videooperator Ulan Núsipqojanyń jubaiy kúieýine qatysty bultartpaý sharasyn ózgertip, ony úiqamaqqa shyǵarýdy nemese aýrýhanaǵa aýystyrýdy surady, dep habarlaidy dalanews.kz.
Tolǵanaidyń aitýynsha, kúieýi asa aýyr qylmys jasady degen kúdikke ilinbegenine qaramastan, qamaýda densaýlyǵy kúrt nasharlaǵan.
«Meniń joldasym Ulan – jaldamaly qyzmetker, videooperator. Onyń jumysy tek jumys berýshiniń tapsyrmasy boiynsha beine túsirý, jazý jáne montaj jasaýmen ǵana shekteldi. Qazir Ulan Almaty qalasyndaǵy UQK tergeý izoliatorynda aýyrlyǵy ortasha qylmysqa kúdikti retinde otyr. Jaqynda sot onyń qamaý merzimin taǵy tórt aiǵa, 18 shildege deiin uzartty. Meniń oiymsha, bul sheshim erekshe qatygezdikpen qabyldandy. Óitkeni sot ta, tergeý de Ulannyń aýyr jaǵdaida ekenin jaqsy biledi», – dedi ol.
Onyń sózinshe, tergeý izoliatorynda dárigerler Ulannan jedel virýstyq infektsiia, baýyrdyń aýyr intoksikatsiiasy, anemiia jáne aǵzanyń qatty álsireýin anyqtaǵan.
«Dárigerlerdiń qorytyndysyna sáikes Ulanǵa mindetti túrde MRT jasaý qajet boldy. Biz ony 26 maýsymda ótkizdik. Nátijesinde onkomarkerlerge taldaý tapsyrý taǵaiyndaldy. Tergeý de, sot ta bul meditsinalyq qujattardy, onkologtyń qorytyndysyn kórip otyr. Soǵan qaramastan kúieýimdi em alý úshin úiqamaqqa shyǵarýdan bas tartyp keledi», – dedi Tolǵanai.
Ol kúieýiniń qoǵamǵa qaýip tóndirmeitinin aityp, quqyq qorǵaýshylar men qoǵamnan qoldaý surady.
«Meniń joldasym kisi óltirgen joq, qaýipti qylmysker de emes. Ol eshqaida qashyp ketpeidi. Ony emdelý múmkindiginsiz jabyq kamerada ustaý meniń oiymsha, bul ádil sot emes, naǵyz azaptaý. Men Qazaqstandaǵy Adam quqyqtary jónindegi ýákil Artýr Lastaevtyń atyna resmi ótinish joldadym. Sebebi kúieýimniń ómir súrý jáne densaýlyǵyn qorǵaý jónindegi konstitýtsiialyq quqyqtary óreskel buzylyp otyr dep esepteimin. Meniń jalǵyz maqsatym Ulandy úiqamaqqa aýystyrý nemese oǵan qajetti meditsinalyq kómek kórsetiletin aýrýhanaǵa jatqyzý», – dedi ol.
Eske salaiyq, buǵan deiin Bas prokýrordyń orynbasary Erlan Ótegenov qoǵamdyq belsendi Sanjar Bokaevqa asa iri kólemdegi alaiaqtyq jáne zańsyz aǵash kesýdi uiymdastyrdy degen kúdik keltirilgenin málimdegen bolatyn.
