Qazaqstanda meditsina qyzmetkerlerine shabýyl jasaǵandarǵa qatysty 50-ge jýyq qylmystyq is qozǵaldy. Bul týraly Úkimettegi brifingte Densaýlyq saqtaý ministri Aqmaral Álnazarova málimdedi, dep habarlaidy dalanews.kz.
Ministrdiń aitýynsha, biyl sáýir aiynda meditsina qyzmetkerlerine shabýyl jasaǵany úshin jaýapkershilikti kúsheitetin zań normalary kúshine endi. Sodan beri el boiynsha osy sanattaǵy 50-ge jýyq qylmystyq is tirkelgen.
Álnazarova dárigerlerdiń negizgi mindeti sapaly meditsinalyq kómek kórsetý ekenin atap ótti.
Eske salaiyq, qańtar aiynyń basynda prezident Qasym-Jomart Toqaev meditsina qyzmetkerleri men jedel járdem júrgizýshilerine shabýyl jasaǵany úshin jaýapkershilikti kózdeitin Qylmystyq jáne Qylmystyq-protsestik kodeksterge engizilgen túzetýlerge qol qoiǵan.
Qylmystyq kodekske 380-3-bap engizildi. Ol meditsina qyzmetkerine nemese jedel járdem júrgizýshisine qyzmettik mindetin atqarý kezinde ómiri men densaýlyǵyna qaýipti emes kúsh qoldanǵany nemese kúsh qoldanamyn dep qorqytqany úshin jaýapkershilikti qarastyrady. Mundai áreket úshin 500-den 1 000 AEK-ke deiin aiyppul, qoǵamdyq jumystarǵa tartý, eki jylǵa deiin bas bostandyǵyn shekteý nemese aiyrý jazasy kózdelgen.
Al aýyrlatatyn mán-jailar kezinde, sonyń ishinde top bolyp shabýyl jasaý nemese birneshe meditsina qyzmetkerine kúsh qoldaný jaǵdailarynda jaza úsh jyldan jeti jylǵa deiin bas bostandyǵynan aiyrýdy qamtýy múmkin. Meditsina qyzmetkeriniń ómiri men densaýlyǵyna qaýipti kúsh qoldanǵany úshin bes jyldan on jylǵa deiin, al aýyrlatatyn mán-jailar bolǵanda jeti jyldan on eki jylǵa deiin bas bostandyǵynan aiyrý jazasy qarastyrylǵan.
