تۇركىستان وبلىسىنا جۇمىس ساپارى بارىسىندا قازاقستان رەسپۋبليكاسىنىڭ پرەمەر-مينيسترى ولجاس بەكتەنوۆ سۋ قويمالارىنىڭ جاي-كۇيىمەن، گيدروتەحنيكالىق قۇرىلىستاردى قايتا جاڭعىرتۋ جۇمىستارىنىڭ بارىسىمەن جانە ەلىمىزدىڭ وڭتۇستىك وڭىرلەرىن تۇراقتى سۋمەن قامتاماسىز ەتۋ بويىنشا اتقارىلىپ جاتقان شارالارمەن تانىستى،- دەپ حابارلايدى Dalanews.kz
پرەمەر-مينيستر «شاردارا» سۋ قويماسى مەن «كوكساراي» سۋ رەتتەگىش نىسانىن بارىپ كوردى.
«قازگيدرومەت» رمك-نىڭ مالىمەتى بويىنشا، ەلىمىزدىڭ وڭتۇستىك وڭىرلەرىندەگى بيىلعى ۆەگەتاسيا ماۋسىمىندا جاۋىن-شاشىن تاپشى بولىپ تۇر. دۇنيەجۇزىلىك مەتەورولوگيالىق ۇيىم مەن سولتۇستىك ەۋرازيالىق كليمات ورتالىعىنىڭ بولجامدارىندا گيدرولوگيالىق قۇرعاقشىلىقتىڭ ىقتيمالدىعى جوعارى. بۇل اۋىل شارۋاشىلىعىنا قاتەر تۋدىرىپ وتىر، اسىرەسە سىرداريا وزەنى باسسەينى بويىندا قۇرعاق اۋا رايى ۇزاق ۋاقىت ساقتالار بولسا، كەيبىر جەرلەردە ەگىن قۋراپ كەتۋى مۇمكىن.
سۋ بەرۋدى وڭتايلاندىرۋ جونىندەگى ىشكى شارالارمەن قاتار، ۇكىمەت سىرداريا وزەنىنىڭ جوعارى جاعىندا ورنالاسقان كورشىلەس مەملەكەتتەرمەن ورتالىق ازيانىڭ مەملەكەتارالىق سۋ شارۋاشىلىعىن ۇيلەستىرۋ كوميسسياسى اياسىندا كەلىسسوزدەر جۇرگىزۋدە. قول جەتكىزىلگەن كەلىسىمدەر سۋدى ۋاقتىلى الۋعا مۇمكىندىك بەرەدى.
شاردارا سۋ قويماسىنىڭ جۇمىسىمەن تانىسۋ كەزىندە پرەمەر-مينيسترگە نىساننىڭ جاعدايى مەن وڭتۇستىك وڭىرلەردەگى سۋارۋ جۇمىستارى تۋرالى باياندالدى. بۇل – تۇركىستان جانە قىزىلوردا وبلىستارىنداعى اۋىل شارۋاشىلىعى القاپتارىن سۋارمالى سۋمەن، سونداي-اق شاردارا قالاسىنىڭ تۇرعىندارىن اۋىز سۋمەن قامتاماسىز ەتەتىن نەگىزگى سۋ نىسانى.
ولجاس بەكتەنوۆ سۋدى بولۋدە اشىقتىقتى قامتاماسىز ەتۋ ءۇشىن قاداعالاۋدى كۇشەيتۋ قاجەتتىگىن ايتتى.
«اگروونەركاسىپ كەشەنى – ەكونوميكانىڭ نەگىزگى سەكتورلارىنىڭ ءبىرى. قازىرگى جاعدايدا سۋ رەسۋرستارىن قاجەتىنە قاراي جانە قاتاڭ قاداعالاي وتىرىپ ءبولۋ ەرەكشە ماڭىزعا يە. قاداعالاۋدى بارلىق دەڭگەيدە كۇشەيتىپ، سۋ ءبولۋدى اشىق ەتۋ قاجەت»، — دەپ اتاپ ءوتتى پرەمەر-مينيستر.
وسى تۇرعىدا پرەمەر-مينيستردىڭ ورىنباسارى قانات بوزىمبايەۆقا كورشىلەس ەلدەرمەن سۋ بەرۋ رەجيمدەرىن كەلىسۋ جانە تۋىنداعان ماسەلەلەرگە جەدەل دەن قويۋ، سونىڭ ىشىندە تۇرعىنداردى اۋىز سۋمەن قامتاماسىز ەتۋ بويىنشا جۇمىستاردى ۇيلەستىرۋ تاپسىرىلدى.
«كوكساراي» سۋ رەتتەگىش نىسانىن تەكسەرۋ قورىتىندىسىندا پرەمەر-مينيستر سۋ رەسۋرستارى جانە يرريگاسيا مينيسترلىگىنە كونتررەتتەگىشتىڭ تولىق قۋاتىندا جۇمىس ىستەۋىن قالپىنا كەلتىرۋ ماقساتىندا رەكونسترۋكسيالاۋ جۇمىستارىن جەدەلدەتۋدى تاپسىردى. بۇل وزەن اعىنىن قاجەتىنە قاراي رەتتەۋ جانە وڭتۇستىك وڭىرلەردەگى شارۋالاردى تۇراقتى سۋمەن قامتاماسىز ەتۋ ءۇشىن قاجەت.
ولجاس بەكتەنوۆ ترانسشەكارالىق سۋ كوزدەرىنەن كەلەتىن سۋ كولەمىنىڭ ازايۋىنا بايلانىستى ۇكىمەت ىشكى سۋ قورىن دامىتۋعا باسىمدىق بەرىپ وتىرعانىن اتاپ ءوتتى.
«مەملەكەت باسشىسى كوكتەمگى جانە ەرىگەن قار سۋىن جيناپ، ونى ەگىستىككە ءتيىمدى پايدالانۋ ءۇشىن 20 جاڭا بوگەن سالۋ، كەمىندە 15 سۋ قويماسىنا كۇردەلى جوندەۋ جۇرگىزۋ جونىندە تاپسىرما بەرگەن بولاتىن. تاياۋ ۋاقىتتا “بايدىبەك اتا” جانە “بورالداي” سۋ قويمالارى ارقىلى “بوگەن” سۋ قويماسىنا قوسىمشا 113 ملن تەكشە مەتر سۋ بەرىلگەنىنىڭ ارقاسىندا تۇركىستان قالاسى كەپىلدى تۇردە سۋمەن قامتاماسىز ەتىلەتىن بولادى. ترانسشەكارالىق سۋ كوزدەرىنەن كەلەتىن سۋ كولەمى جىلدان-جىلعا ازايىپ كەلەدى. سوعان بايلانىستى ءبىز ىشكى سۋ قورلارىن بارىنشا پايدالانۋ ءۇشىن قوسىمشا سۋ قويمالارىن سالۋ جولدارىن قاراستىرۋىمىز قاجەت»،— دەپ اتاپ ءوتتى ولجاس بەكتەنوۆ.
پرەمەر-مينيستر سۋ رەسۋرستارى جانە يرريگاسيا مينيسترلىگىنە تۇركىستان وبلىسىنىڭ اكىمدىگىمەن بىرلەسىپ، وڭىردەگى سۋ شارۋاشىلىعى جوبالارىن ۋاقتىلى قارجىلاندىرۋدى جانە جۇزەگە اسىرۋدى تاپسىردى.
