Tailandtan jetkizilgen meditsinalyq qolǵaptardy "SK-Farmatsiia" otandyq ónim sekildi kórsetken ári onyń baǵasy asyra baǵalanǵan. Bul týraly Joǵary aýditorlyq palatanyń "KazMedProm" JShS-ǵa qatysty jaǵdaiǵa bergen túsiniktemesinde aitylady, dep habarlaidy Dalanews.kz.
Dárilik zattarmen qamtamasyz etý salasyna júrgizilgen aýdit barysynda otandyq farmatsevtikalyq ónim óndirýshilerge kórsetiletin memlekettik qoldaý sharalarynyń tiimdiligi tekserildi. Mundai qoldaý sharalarynyń biri – uzaq merzimdi sharttar jasasý. Bul sharttarǵa sáikes, "SK-Farmatsiia" otandyq óndirýshilerdiń ónimin olardyń kórsetken baǵasy boiynsha satyp alýǵa mindetteledi. Atalǵan mehanizm qazaqstandyq farmatsevtika óndirisin damytýǵa baǵyttalǵan.
Alaida aýdit barysynda sheteldik ónimniń otandyq ónim retinde satylǵanyn rastaityn jekelegen jaǵdailar anyqtaldy.
"Máselen, 2024 jyly "KazMedProm" JShS otandyq óndirýshi mártebesin paidalanyp, "SK-Farmatsiiaǵa" jalpy somasy 8,1 mlrd teńgege 63 mln jup meditsinalyq qolǵap jetkizgen. Alaida jetkizilgen taýardyń kólemi men sipattamasy dál sol kezeńde kompaniianyń Tailandtan satyp alǵan qolǵaptar partiiasymen tolyq sáikes keledi. Kedendik deklaratsiialar olardyń syrttan ákelingenin rastaidy, al jetkizý merzimderi "SK-Farmatsiiaǵa" jóneltilgen kúndermen sáikes. Aýditorlar bul jaǵdaida importtyq ónimniń otandyq ónim retinde usynylý qaýpi bar degen tujyrymǵa keldi. Sonymen qatar meditsinalyq ónimder baǵasynyń da negizsiz joǵary ekeni anyqtaldy: "KazMedProm" Panagloves diagnostikalyq lateks qolǵaptaryn jubyna 98 teńgeden satqan, al naryqta olardyń quny shamamen 40 teńge turady. Sonyń saldarynan memleket 5,3 mlrd teńge artyq tólegen", delingen JAP habarlamasynda.
Osy aitylǵandardy eskere otyryp, 2025 jylǵy 27 mamyrda aýdit materialdary Bas prokýratýraǵa joldandy. Nátijesinde 18 shildede Bas prokýratýra bul materialdardy protsessýaldyq sheshim qabyldaý úshin Qarjylyq monitoring agenttigine jiberdi.
Sondai-aq 22 mamyrda, iaǵni Joǵary aýditorlyq palata materialdardy quqyq qorǵaý organdaryna joldaǵanǵa deiin, Shymkent qalasynyń prokýratýrasy kompaniia qyzmetine tekserý taǵaiyndap, ony 27 maýsymda aiaqtaǵan.
Qalalyq prokýratýranyń tekserýi nátijesinde "KazMedProm" JShS jylyna shamamen 17 mln jup qolǵap óndiretini anyqtaldy. Shamamen taǵy 50 mln jup qolǵap Tailandtan in bulk formatynda ákelinetin ónimnen daiyndalady.
In bulk ónim – bul tutynýshylyq qaptamasyz, jai ǵana qaptarǵa salynǵan qolǵaptar. Mundai ónimnen qolǵap jasaý protsesi olardy jýý, keptirý, dezinfektsiialaý jáne qaptaýdan turady. Shymkent qalasynyń prokýratýrasy bul áreketti qaita óńdeý dep baǵalap, qylmys negiz joq dep tanyǵan.
"Alaida mundai óńdeý jetkilikti dep sanalmaidy, sebebi bul jaǵdaida taýar nomenklatýrasynyń kody ózgermeidi (atalǵan jaǵdaida ózgermegen). Demek bul is júzinde óndiris bolyp sanalmaidy. Ónimdi memleketke naryqtaǵydan edáýir joǵary baǵamen ótkizý faktisi de oryn alǵan. Osylaisha, otandyq óndirýshiler tarapynan óndiristi jergiliktendirý sharttarynyń saqtalýyn baqylaý tetikteriniń, sondai-aq baǵa retteý tetikteriniń tiimsizdigi týraly Joǵary aýditorlyq palatanyń qorytyndysy tolyq negizdelgen", - degen pikirde quzyrly organ.
Buǵan deiin saitymyzda "Depýtattyń daýly málimdemesinen keiin "SQ-Farmatsiia" basshylyǵy aýysty" degen maqala jariialanǵan bolatyn.
