تايلاندتان جەتكىزىلگەن مەديسينالىق قولعاپتاردى "سك-فارماسيا" وتاندىق ءونىم سەكىلدى كورسەتكەن ءارى ونىڭ باعاسى اسىرا باعالانعان. بۇل تۋرالى جوعارى اۋديتورلىق پالاتانىڭ "KazMedProm" جشس-عا قاتىستى جاعدايعا بەرگەن تۇسىنىكتەمەسىندە ايتىلادى، دەپ حابارلايدى Dalanews.kz.
دارىلىك زاتتارمەن قامتاماسىز ەتۋ سالاسىنا جۇرگىزىلگەن اۋديت بارىسىندا وتاندىق فارماسيەۆتيكالىق ءونىم وندىرۋشىلەرگە كورسەتىلەتىن مەملەكەتتىك قولداۋ شارالارىنىڭ تيىمدىلىگى تەكسەرىلدى. مۇنداي قولداۋ شارالارىنىڭ ءبىرى – ۇزاق مەرزىمدى شارتتار جاساسۋ. بۇل شارتتارعا سايكەس، "سك-فارماسيا" وتاندىق وندىرۋشىلەردىڭ ءونىمىن ولاردىڭ كورسەتكەن باعاسى بويىنشا ساتىپ الۋعا مىندەتتەلەدى. اتالعان مەحانيزم قازاقستاندىق فارماسيەۆتيكا ءوندىرىسىن دامىتۋعا باعىتتالعان.
الايدا اۋديت بارىسىندا شەتەلدىك ءونىمنىڭ وتاندىق ءونىم رەتىندە ساتىلعانىن راستايتىن جەكەلەگەن جاعدايلار انىقتالدى.
"ماسەلەن، 2024 جىلى "KazMedProm" ج ش س وتاندىق ءوندىرۋشى مارتەبەسىن پايدالانىپ، "سك-فارماسياعا" جالپى سوماسى 8،1 ملرد تەڭگەگە 63 ملن جۇپ مەديسينالىق قولعاپ جەتكىزگەن. الايدا جەتكىزىلگەن تاۋاردىڭ كولەمى مەن سيپاتتاماسى ءدال سول كەزەڭدە كومپانيانىڭ تايلاندتان ساتىپ العان قولعاپتار پارتياسىمەن تولىق سايكەس كەلەدى. كەدەندىك دەكلاراسيالار ولاردىڭ سىرتتان اكەلىنگەنىن راستايدى، ال جەتكىزۋ مەرزىمدەرى "سك-فارماسياعا" جونەلتىلگەن كۇندەرمەن سايكەس. اۋديتورلار بۇل جاعدايدا يمپورتتىق ءونىمنىڭ وتاندىق ءونىم رەتىندە ۇسىنىلۋ ءقاۋپى بار دەگەن تۇجىرىمعا كەلدى. سونىمەن قاتار مەديسينالىق ونىمدەر باعاسىنىڭ دا نەگىزسىز جوعارى ەكەنى انىقتالدى: "KazMedProm" Panagloves دياگنوستيكالىق لاتەكس قولعاپتارىن جۇبىنا 98 تەڭگەدەن ساتقان، ال نارىقتا ولاردىڭ قۇنى شامامەن 40 تەڭگە تۇرادى. سونىڭ سالدارىنان مەملەكەت 5،3 ملرد تەڭگە ارتىق تولەگەن"، دەلىنگەن جاپ حابارلاماسىندا.
وسى ايتىلعانداردى ەسكەرە وتىرىپ، 2025 جىلعى 27 مامىردا اۋديت ماتەريالدارى باس پروكۋراتۋراعا جولداندى. ناتيجەسىندە 18 شىلدەدە باس پروكۋراتۋرا بۇل ماتەريالداردى پروسەسسۋالدىق شەشىم قابىلداۋ ءۇشىن قارجىلىق مونيتورينگ اگەنتتىگىنە جىبەردى.
سونداي-اق 22 مامىردا، ياعني جوعارى اۋديتورلىق پالاتا ماتەريالداردى قۇقىق قورعاۋ ورگاندارىنا جولداعانعا دەيىن، شىمكەنت قالاسىنىڭ پروكۋراتۋراسى كومپانيا قىزمەتىنە تەكسەرۋ تاعايىنداپ، ونى 27 ماۋسىمدا اياقتاعان.
قالالىق پروكۋراتۋرانىڭ تەكسەرۋى ناتيجەسىندە "KazMedProm" ج ش س جىلىنا شامامەن 17 ملن جۇپ قولعاپ وندىرەتىنى انىقتالدى. شامامەن تاعى 50 ملن جۇپ قولعاپ تايلاندتان in bulk فورماتىندا اكەلىنەتىن ونىمنەن دايىندالادى.
In bulk ءونىم – بۇل تۇتىنۋشىلىق قاپتاماسىز، جاي عانا قاپتارعا سالىنعان قولعاپتار. مۇنداي ونىمنەن قولعاپ جاساۋ پروسەسى ولاردى جۋۋ، كەپتىرۋ، دەزينفەكسيالاۋ جانە قاپتاۋدان تۇرادى. شىمكەنت قالاسىنىڭ پروكۋراتۋراسى بۇل ارەكەتتى قايتا وڭدەۋ دەپ باعالاپ، قىلمىس نەگىز جوق دەپ تانىعان.
"الايدا مۇنداي وڭدەۋ جەتكىلىكتى دەپ سانالمايدى، سەبەبى بۇل جاعدايدا تاۋار نومەنكلاتۋراسىنىڭ كودى وزگەرمەيدى (اتالعان جاعدايدا وزگەرمەگەن). دەمەك بۇل ءىس جۇزىندە ءوندىرىس بولىپ سانالمايدى. ءونىمدى مەملەكەتكە نارىقتاعىدان ەداۋىر جوعارى باعامەن وتكىزۋ فاكتىسى دە ورىن العان. وسىلايشا، وتاندىق وندىرۋشىلەر تاراپىنان ءوندىرىستى جەرگىلىكتەندىرۋ شارتتارىنىڭ ساقتالۋىن باقىلاۋ تەتىكتەرىنىڭ، سونداي-اق باعا رەتتەۋ تەتىكتەرىنىڭ تيىمسىزدىگى تۋرالى جوعارى اۋديتورلىق پالاتانىڭ قورىتىندىسى تولىق نەگىزدەلگەن"، - دەگەن پىكىردە قۇزىرلى ورگان.
بۇعان دەيىن سايتىمىزدا "دەپۋتاتتىڭ داۋلى مالىمدەمەسىنەن كەيىن "سق-فارماسيا" باسشىلىعى اۋىستى" دەگەن ماقالا جاريالانعان بولاتىن.
