Májilis depýtaty Berik Beisenǵaliev jumys berýshiler tóleitin áleýmettik tólemderdiń barlyǵyn bir tólemge biriktirýdi usyndy, dep habarlaidy dalanews.kz.
Depýtattyń aitýynsha, qazirgi tańda shaǵyn kásiporyndardyń býhgalterleri ár qyzmetker boiynsha ai saiyn jeti-segiz túrli tólemdi esepteýge májbúr. Onyń árqaisysynyń esepteý bazasy, limiti jáne tóleý tártibi ártúrli.
Osyǵan bailanysty májilismen jumys berýshiniń áleýmettik salyǵyn, áleýmettik aýdarymdaryn, MÁMS jarnalaryn jáne jumys berýshiniń mindetti zeinetaqy jarnalaryn bir tólemge biriktirýdi usyndy.
«Qyzmetkerlerdiń mindetti zeinetaqy jarnalary men jeke tabys salyǵyn qazirgi kúiinde saqtaýdy oryndy dep sanaimyz. Sonymen qatar jumys berýshiniń qalǵan barlyq tólemderin – áleýmettik salyqty, áleýmettik aýdarymdardy, MÁMS aýdarymdaryn jáne jumys berýshiniń mindetti zeinetaqy jarnalaryn biryńǵai áleýmettik tólemge biriktirý múmkindigin qarastyrýdy usynamyz. Iaǵni: bir qyzmetker, bir baza, bir esep, bir tólem qaǵidaty boiynsha. Al túsken qarajatty memleket ózdiginen bólip otyrady», – dedi Beisenǵaliev Májilis otyrysynda.
Onyń pikirinshe, eńbekke túsetin shamadan tys júkteme biznestiń bir bóligin kóleńkeli ekonomikaǵa ketýge itermeleýi múmkin.
«Álemdik tájiribe belgili Laffer qisyǵynyń qorytyndylaryn rastaidy: eńbekke túsetin shamadan tys júkteme túsimderdiń artýyna emes, jalaqynyń bir bóliginiń kóleńkege ketýi arqyly salyq bazasynyń qysqarýyna alyp keledi», – dedi depýtat.
Májilismen mysal retinde Grýziiany atady. Onyń aitýynsha, bul elde jalaqy qorynan alynatyn dástúrli aýdarymdardyń ornyna 20 paiyzdyq biryńǵai tabys salyǵy qoldanylady. Sonymen qatar Estoniia, Shvetsiia jáne Singapýrda da biryńǵai áleýmettik salyq júiesi bar.
Berik Beisenǵalievtiń málimetinshe, Qazaqstanda jalaqy qoryna túsetin jiyntyq júkteme qazirdiń ózinde 39,5 paiyzǵa jetken.
«Ulttyq ekonomika ministrliginiń derekterine sáikes, Qazaqstanda jalaqy qoryna túsetin jiyntyq júkteme 39,5 paiyzǵa jetti jáne aldaǵy jyldary 41 paiyzdan asýy múmkin. Sonymen qatar jekelegen áleýmettik tólemder kólemi óse beredi», – dedi ol.
Depýtattyń pikirinshe, biryńǵai tólem engizý biznestiń ákimshilik shyǵyndaryn azaityp, eseptilikti jeńildetýge jáne eńbek qatynastaryn zańdastyrýǵa yqpal etýi múmkin.
Osyǵan bailanysty ol Úkimetten Qazaqstan men EYDU elderindegi eńbekke túsetin júktemege salystyrmaly taldaý júrgizýdi, onyń jańa jumys oryndaryn qurý men kóleńkeli jumyspen qamtýǵa áserin baǵalaýdy jáne shaǵyn jáne orta biznes úshin biryńǵai áleýmettik tólem engizý múmkindigin qarastyrýdy surady.
