Qazaqstanda aýasy eń las qalalar anyqtaldy, dep habarlaidy dalanews.kz.
Qazgidromet málimetinshe, Qaraǵandy men Astanada aýa sapasy óte nashar bolǵan. Qyrkúiekte mamandar eldegi 69 eldi mekenniń aýa sapasyn teksergen. Monitoring nátijesinde eki eldi mekende aýanyń lastaný deńgeii óte joǵary, jeteýinde joǵary, 27-sinde kóterińki, al 33-inde tómen bolǵan.
Aýanyń lastaný deńgeii óte joǵary eldi mekender qataryna Qaraǵandy men Astana kirdi.
Al Almaty, Pavlodar, Temirtaý, Petropavl qalalarynda, Shubarshy kentinde, Janbai aýylynda jáne Túrkistan oblysyndaǵy Dostyq eldi mekeninde lastaný deńgeii joǵary bolǵan.
Aýanyń lastaný deńgeii kóterińki 27 eldi mekenniń tizimine Aqtóbe, Atyraý, Shymkent, Óskemen, Aqtaý, Qostanai, Semei, Arqalyq, Ridder, Taldyqorǵan, Taraz, Jezqazǵan, Sátbaev, Túrkistan, Talǵar, Jitiqara, Qandyaǵash, Aral, Shý, Aiagóz, Hromtaý, Inderbor, Ganiýshkino, Keńqiiaq, Shieli, Qarabalyq jáne Sastóbe kirdi.
Al Kókshetaý, Oral, Qyzylorda, Ekibastuz, Balqash, Rýdnyi, Jańaózen, Stepnogorsk jáne Shýchinsk qalalary aýanyń lastaný deńgeii tómen 33 eldi mekenniń qatarynda ataldy.
Qyrkúiekte Qazgidromet mamandary 69 eldi mekendegi 173 baqylaý beketinde aýa sapasyn qadaǵalaǵan. Onyń 45-inde synamalar qolmen alynsa, qalǵan 128 beket avtomatty túrde jumys istegen.
