Almatyda Qazaqstannyń burynǵy prezidentiniń jieni Qairat Satybaldyǵa tiesili bolǵan bes juldyzdy DoubleTree by Hilton qonaqúii satyldy. Nysan elektrondy aýktsionda 12,38 mlrd teńgege baǵalandy. Qonaqúidi satý úsh áreketten keiin ǵana júzege asty, dep habarlaidy dalanews.kz.
Elektrondy saýda alańy e-Qazyna.kz málimetinshe, nysannyń túpkilikti satý baǵasy 12 mlrd 384 mln 291 myń 448 teńgeni qurady.
Qonaqúi úsh ret saýdaǵa shyǵaryldy
DoubleTree by Hilton qonaqúiin satý birden júzege aspady. Nysan alǵash ret 2026 jylǵy 25 qyrkúiekte aýktsionǵa shyǵaryldy. Bastapqy baǵasy 12,7 mlrd teńge bolǵanymen, satyp alýǵa ótinim túspegendikten saýda ótkizilmedi. 13 qazanda qonaqúi ekinshi ret satylymǵa qoiyldy. Bul joly da bastapqy baǵa 12,7 mlrd teńge bolyp belgilendi. Alaida jalǵyz qatysýshyǵa satý múmkindigi qarastyrylǵanyna qaramastan, satyp alýshy tabylmady.
29 qazanda ótken úshinshi saýdada nysannyń bastapqy baǵasy 38,2 mlrd teńgege deiin kóterildi. Biraq bul joly baǵany tómendetý ádisi qoldanyldy. Nátijesinde qonaqúi 12,38 mlrd teńgege satyldy. Táýelsiz baǵalaý qorytyndysy boiynsha, ǵimarattyń naryqtyq quny shamamen 12,7 mlrd teńge bolǵan.
Qonaqúi memleket menshigine qalai ótti?
DoubleTree by Hilton qonaqúii 2023 jylǵy qyrkúiekte memleket menshigine berilgen. Ol kezde Qairat Satybaldyuly qylmystyq ister aiasynda keltirilgen zalaldy óteý maqsatynda Almaty qalasynyń memlekettik múlik departamentimen ǵimaratty memleketke berý týraly syiǵa tartý shartyn jasasqan.
Nysan memleket menshigine ótken kezde onyń quny 6,49 mlrd teńgege baǵalanǵan.
