Almatydaǵy birqatar turǵyn úi kesheni men turǵyn alaptyń elektr energiiasy úshin jinalǵan qaryzy 1,8 mlrd teńgege jetken. Onyń 600 mln teńgege jýyǵy belgilengen merzimde tólenbegen, dep habarlaidy dalanews.kz.
BES.media redaktsiiasyna "Alataý Jaryq Kompaniiasy" men Almaty qalasynyń Energetika jáne sýmen jabdyqtaý basqarmasy usynǵan málimetke sáikes, eń iri bereshek Qazaq Stroy kompaniiasy salǵan 26 turǵyn úi keshenine tiesili. 27 qazandaǵy esep boiynsha olardyń ótelmegen qaryzy 842,6 mln teńgeni quraǵan. Ai basynda bul kórsetkish 990,7 mln teńge bolǵan. Osylaisha, qazan aiynyń ishinde bereshek 148,1 mln teńgege azaiǵan.
23 qazandaǵy derek boiynsha, "Rams Qazaqstan" kompaniiasynyń qaryzy 46,9 mln teńgege jetse, "Rams City" turǵyn úi kesheniniń múlik ieleri birlestigine 47,1 mln teńge bereshek tirkelgen. Bostandyq aýdanyndaǵy Ótepov kóshesi, 31 mekenjaiynda ornalasqan bul keshen 44 úi men 2886 páterden turady.
Turǵyndar jaryq aqysyn nege tikelei tólei almaidy?
Qaladaǵy keibir turǵyn úi keshenderinde páter ielerine jeke derbes shot áli ashylmaǵan. Sondyqtan elektr energiiasynyń shyǵyny ortaq esepteý quraldary arqyly anyqtalyp, energiia jetkizýshimen jasalǵan kelisim zańdy tulǵanyń atyna rásimdeledi.
Ákimdik munyń birneshe sebebin atady. Keibir qurylys kompaniialary elektr jelilerin kommýnaldyq menshikke ýaqytynda ótkizbeidi, qajetti qujattardy tolyq rásimdemeidi nemese jelilerdiń kimniń balansynda bolatynyn naqtylamaidy.
Mundai jaǵdaida turǵyndar jaryq aqysyn múlik ieleri birlestigine nemese basqarýshy kompaniiaǵa aýdarady. Al jinalǵan qarajatty elektr energiiasyn jetkizýshi mekemege sol uiym tóleýge tiis. Alaida turǵyndardyń túbirtek boiynsha tólem jasaýy qarajattyń jetkizýshige tolyq aýdarylǵanyn bildirmeidi.
Qaryzdy óndirý sotqa jetti
Energetika basqarmasynyń málimetinshe, Alma City turǵyn úi kesheniniń 4/2 jáne 5 ýchaskeleri boiynsha sot sheshimi shyǵarylǵan. Eki keshennen óndiriletin qaryzdyń jalpy kólemi 299 mln teńgeni quraidy.
Mundai daýly jaǵdailarda turǵyndarǵa eseptelgen tólem somasyn, turǵyndardan naqty jinalǵan qarajatty jáne energiia jetkizýshige aýdarylǵan qarjyny ózara salystyrý qajet.
Jeke kelisimsharty bar páter ieleri tólem tarihyn "EnergoSbyt" mekemesinen teksere alady. Al esep aiyrysý ortaq eseptegish arqyly júrgizilse, qarajattyń jinalýy men jetkizýshige aýdarylýy jónindegi málimetti múlik ieleri birlestiginen nemese basqarýshy kompaniiadan suratqan jón.
