Áleýmettik jelide "Haker Atyraý" degen atpen tanylǵan azamat alaiaqtyq isi boiynsha ótip jatqan sotta ózine taǵylǵan aiypqa qatysty pikir bildirdi. Ol kásipkerlik jobasy sátsiz aiaqtalǵannan keiin qomaqty qaryzǵa batqanyn jáne shetelde jumys istep, beresheginiń basym bóligin ótegenin aitty, dep habarlaidy dalanews.kz.
Atyraýda ótip jatqan sot protsesinde aiyptalýshy jýrnalist Janat Moldashevanyń suraqtaryna jaýap bergen.
Onyń sózinshe, bastapqyda investorlar aldyndaǵy bereshegi shamamen 100 million teńgege jetken. Alaida keiin jumys istep, qaryzdyń bir bóligin qaitarǵan.
Aiyptalýshy investorlardan alǵan qarajatty jeke qajettilikterine jumsamaǵanyn jáne barlyq qarjylyq operatsiia zańdy túrde tirkelgen jaýapkershiligi shekteýli seriktestik arqyly júrgizilgenin málimdedi.
"Eger qarajatty qaltama basyp, qashyp ketsem, men naǵyz alaiaq bolar edim. Biraq men JShS tirkep, resmi esep júrgizdim, barlyq mindettemeni oryndadym", – dedi ol.
Sottalýshynyń aitýynsha, onyń qarjylyq qiyndyqtary 2024 jyly bastalǵan. Ol sol jyly Tsifrlyq damý ministrliginiń ókilderi Atyraýǵa kelgen kezde basqa kompaniia ózderiniń IT-ónimin kóshirip alyp, memlekettik organdarǵa jeke ázirlemesi retinde usynǵanyn málimdedi. Aiyptalýshy bul jaǵdaidan keiin startap jobasynyń jumysy toqtap, qarjylyq mindettemeler óz moinynda qalǵanyn aitty. Alaida basqa kompaniianyń jobany zańsyz paidalanǵany týraly málimdeme ázirge aiyptalýshynyń jeke ustanymy bolyp sanalady. Bul derektiń táýelsiz túrde rastalǵany jóninde aqparat keltirilmegen.
Aiyptalýshynyń sózinshe, IT-joba toqtaǵannan keiin ol investorlar aldyndaǵy bereshegin óteýdiń basqa joldaryn qarastyrǵan. Osy maqsatta meiramhana ashqanymen, jańa kásip te tabys ákelmei, qosymsha shyǵynǵa ushyratqan.
"Osy oqiǵadan soń jobamyz toqtap, shyǵyndy óz moinyma alýǵa týra keldi. Investorlar túsinistik tanytpaǵandyqtan, 100 million teńgedei qaryzǵa battym. Ony óteý úshin meiramhana ashqan edim, ol da shyǵynǵa batyrdy", – dedi ol.
Aiyptalýshy 2025 jyly ózine qatysty qylmystyq is qozǵalǵannan keiin Birikken Arab Ámirlikterine ketkenin jetkizdi. Onyń aitýynsha, Dýbaida jumys istep, tapqan tabysy arqyly investorlar aldyndaǵy qaryzyn birtindep ótegen.
"2025 jyly ústimnen qylmystyq is qozǵalǵan soń Dýbaiǵa ketýge týra keldi. Shetelde júrip jumys istep, qaryzdy jaýyp, ony qazirgi aiypta kórsetilgen 13 million teńgege deiin azaittym", – dedi aiyptalýshy.
Osylaisha, ol bastapqy beresheginiń edáýir bóligin qaitarǵanyn aityp, óz áreketin alaiaqtyq dep sanamaitynyn jetkizdi. Qazirgi ýaqytta atalǵan azamatqa qatysty sot talqylaýy jalǵasyp jatyr. Aiyptalýshynyń qarjylyq operatsiialary, investorlarmen jasalǵan kelisimderi jáne ózge de málimdemeleri sotta dáleldemeler negizinde baǵalanýǵa tiis. Ázirge is boiynsha túpkilikti úkim shyqqany týraly aqparat joq.
